Сўз устаси Шукурулло Исроилов Тошкент шаҳри маданият бошқармаси бошлиғи ўринбосари этиб тайинланди

Бекзод Бахром ўғли Бахромов Тошкент шаҳри маданият бошқармаси бошлиғи, сўз устаси Шукурулло Ахмадкулович Исроилов эса унинг ўринбосари этиб тайинланди. Бу ҳақда Маданият вазирлиги матбуот хизмати хабар бермоқда.

Бу тайинловлар ҳақида 21 август куни маданият вазири Озодбек Назарбеков раислигида ўтказилган йиғилишда маълум қилинди.

Бекзод Бахромов / Фото: Маданият вазирлиги.

«Уларнинг зиммасига соҳада белгиланган вазифаларни самарали амалга ошириш, ислоҳотларнинг мазмун-моҳиятини ҳар бир ходимга етказиш ҳамда натижадорликни таъминлаш бўйича муҳим вазифалар юклатилди», — дея қайд этди вазирлик.

Маданият вазири Озодбек Назарбеков йиғилишда соҳадаги ислоҳотлар ҳақида тўхталиб, у янги босқичга кўтарилиши зарурлигини таъкидлади.

Озодбек Назарбеков (ўнгда) / Фото: Маданият вазирлиги.

«Бизга берилган имконият ва имтиёзлар жуда кўп. Лекин мени бир савол қийнайди: биз бугунги ислоҳотларга қандай жавоб қайтаряпмиз? Қабул қилинаётган ҳужжатларни Тошкент шаҳри ходимлари тўлиқ тушуняптими, ҳис қиляптими ва англаб етяптими? Президентимиз биз учун курашяпти. Биз буни тушуняпмизми?» — деди Озодбек Назарбеков.

Маълумот учун, тайинловга қадар Бекзод Бахромов Тошкент шаҳри маданият бошқармаси бошлиғи ўринбосари, Шукурулло Исроилов эса «Ўзбекконцерт» давлат муассасасида бадиий сўз устаси лавозимида фаолият юритаётганди.

• Шукурулло Исроилов 2023 йилда «Ҳоким бува» мини сериалида роль ижро этган. Сюжетга кўра, унинг қаҳрамони Шукур ака таксичи бўлиб ишлайди ва мамлакатдаги ижтимоий-иқтисодий муаммоларни мунтазам танқид қилади. Шу сабабли ҳамкасблари Шукур акани «Негатив» деб атайди. У ўз монологларида агар шаҳар раҳбарияти ўрнида бўлганида, кўплаб муаммоларни «шесть секундда» ҳал қилган бўлишини таъкидлайди. Эртаси куни эрталаб таксичи костюмда ва пойтахт ҳокими курсисида — Шукур Собитович сифатида уйғонади.