Осиё ўйинлари: Вьетнам ва Қувайт дуранг ўйнади, Ўзбекистон гуруҳ пешқадами

Осиё ўйинлари футбол мусобақасининг гуруҳ босқичи 1-турида Вьетнам U — 23 ва Қувайт U — 23 терма жамоалари 1:1 ҳисобида дуранг ўйнади.

Учрашувнинг биринчи бўлими голсиз якунланди. 78-дақиқада Омар Алматар Қувайтни ҳисобда олдинга олиб чиқди. Бироқ орадан икки дақиқа ўтиб, Нгуен Нгок Ми Вьетнамнинг жавоб голини киритди — 1:1.

Ушбу натижа Ўзбекистон олимпия терма жамоаси учун ҳам қулай бўлди. Равшан Ҳайдаров шогирдлари биринчи турда Филиппинни 5:1 ҳисобида мағлуб этган ва 3 очко билан гуруҳ пешқадами бўлиб турибди.

Қувайт ва Вьетнам бир очкодан жамғарган ҳолда кейинги ўринларни эгаллаган. Филиппин эса ҳозирча очкосиз қолмоқда.

Шу тариқа, биринчи турдан кейин Ўзбекистон U — 23 гуруҳда ягона ғалаба қозонган жамоа сифатида етакчилик қилмоқда.

Манба: www.stadion.uz.