Теннис. Новак Жокович 9 йил ичида илк бор кучли ўнликни тарк этди

Профессионал теннисчилар ассоциацияси (ATP) янгиланган ҳафталик рейтингни эълон қилди. Унга кўра, сербиялик Новак Жокович 790 очко йўқотди ва 5-ўриндан 12-ўринга тушди. Шу тариқа 2002 йил октябрьидан бери илк бор “катта учлик” (Новак Жокович, Рожер Федерер ва Рафаэль Надаль) вакилларидан бирортаси ҳам дунё рейтингининг кучли ўнталигидан жой олмади.

39 ёшли Жокович ҳозирда “катта учлик”нинг фаолиятини давом эттираётган ягона вакили ҳисобланади. Федерер 2022 йилда, Надал эса 2024 йилда профессионал фаолиятини якунлаган. Федерер фаолиятини 41 ёшида, Надал эса 38 ёшида тугатган.

Жоковичнинг рейтингдаги пасайишига унинг АҚШ очиқ чемпионатидаги муваффақиятсиз иштироки сабаб бўлди. Сербиялик теннисчи Нью Йоркдаги турнирнинг илк босқичидаёқ аргентиналик Мариано Навонега имкониятни бой берди. Жокович қарийб 20 йил ичида илк марта “Катта дубулға” турнирларининг дастлабки босқичда мағлубиятга учради.

Сербиялик теннисчи ҳисобида 24 та “Катта дубулға” чемпионлиги бор. Надал 22 та, Федерер эса 20 та Гранд Слам турнирида ғолиб чиққан.

Шунингдек, Новак 428 ҳафта давомида ATP рейтингида пешқадам бўлган.

“Катта учлик” вакилларидан Федерер ATP рейтингининг топ — 10 талигига 2002 йил октябрида кирган ва 2016 йил охирига қадар уни тарк этмаган. Швейцариялик афсона кетма-кет 237 ҳафта давомида рейтинг пешқадамлигини сақлаб қолган.

Надал эса 2005 йил апрелида топ — 10 рейтингдан жой олган ва 2023-йилгача кетма-кет 912 ҳафта давомида кучли ўнталикда қолган. Жокович эса 2007 йилда топ — 10 таликда дебют қилган. 2017 йилда эса тирсак жароҳати сабабли мавсумни 12-ўринда якунлаган эди.

Янгиланган рейтингда италиялик Янник Синнер етакчилик қилмоқда, US Open ғолиби, германиялик Александр Зверев иккинчи, испаниялик Карлос Алкарас эса 3-ўринни эгаллаб турибди. АҚШ очиқ чемпионати финалчиси Бен Шелтон беш поғонага кўтарилиб, 4-ўриндан жой олган.

Маълумот учун, теннис бўйича эркаклар ўртасида мавсумнинг энг сўнгги “Катта дубулға” турнири — US Open финалида Зверев Шелтонни мағлуб этиб, фаолиятида илк бор АҚШ очиқ чемпионати ғолибига айланди.

Манба: daryo.uz