Шавкат Мирзиёев Кореядаги ватандошлар билан учрашди

Шавкат Мирзиёев Корея Республикасига давлат ташрифи доирасида ушбу мамлакатда меҳнат қилаётган ва таҳсил олаётган ватандошлар билан учрашди. Бу ҳақда Президент матбуот хизмати хабар қилди.

Норасмий муҳитда ўтган самимий суҳбатда Ўзбекистонда амалга оширилаётган ислоҳотлар ва уларни ҳаётга фаол татбиқ этишда ватандошлар қўшаётган ҳисса муҳокама қилинди. Учрашув иштирокчилари Ўзбекистон ва Корея ўртасида иқтисодиёт, илм-фан ва таълим соҳаларидаги алоқаларни кенгайтиришга қаратилган қатор илғор таклифларни илгари сурди.

Хусусан, миллий иқтисодиётнинг муҳим тармоқлари ва давлат бошқарувига сунъий интеллект ҳамда Кореянинг рақамли технологияларини интеграция қилиш, тиббиёт, транспорт, божхона ва туризм соҳаларида инновацион ечимларни илгари суриш масалаларига эътибор қаратилди.

Шунингдек, миллий тўлов тизимлари ва пул ўтказмалари платформаларини жадал ривожлантириш, ахборот технологиялари соҳаси учун мутахассислар тайёрлаш бўйича таклифлар муҳокама қилинди.

Маданий-гуманитар ҳамкорликни чуқурлаштириш юзасидан ҳам аниқ ташаббуслар билдирилди. Жумладан, Кореяда Ўзбекистон маданий марказлари тармоғини кенгайтириш, ўзбек тилини ўрганиш дастурларини ривожлантириш, икки мамлакат ҳудудида турли маданий тадбирлар ўтказиш ҳамда ўзбек мумтоз адабиёти намуналарини корейс тилига таржима қилиш масалаларига эътибор қаратилди.

Давлат раҳбари мамлакатнинг ижтимоий-иқтисодий ривожига қўшаётган салмоқли ҳиссаси учун ватандошларга миннатдорлик билдирди.

Шавкат Мирзиёев уларнинг ҳар бир ташаббуси батафсил ўрганилишини, энг муҳим лойиҳалар ҳар томонлама амалий қўллаб-қувватланишини таъкидлади.

Президент учрашувда иштирок этган профессорлар, тадбиркорлар, фаоллар ва талабаларга ўқиш ва касбий фаолиятида муваффақият тилади.

Давлат раҳбари Ўзбекистон ватандошлар билан мулоқотга доимо очиқ эканини, уларнинг бунёдкорлик салоҳиятини рўёбга чиқариш учун зарур шарт-шароитларни яратишга тайёрлигини қайд этди.

Учрашув иштирокчилари эса ёшларга кўрсатилаётган эътибор ва уларнинг орзу-ниятларини рўёбга чиқариш учун яратилаётган янги имкониятлар учун Президентга миннатдорлик билдирди. Улар ўз билим ва ғайратини Ўзбекистон фаровонлиги ва равнақи йўлида сафарбар этишга тайёр эканини айтди.