Ташрифнинг асосий воқеаси Корея Республикаси Президенти Ли Чжэ Мён билан музокаралар бўлди. Томонлар икки томонлама ҳамкорликни янги босқичга олиб чиқишга тайёр эканини тасдиқлади.

Шавкат Мирзиёев ташриф доирасида Миллий Ассамблея Спикери Чо Чжон Сик ва Бош вазир Хан Сон Сук билан ҳам учрашди. Мулоқотларда парламентлараро алоқалар, савдо, инвестициялар, технологиялар ва транспорт-логистика соҳаларидаги ҳамкорликни ривожлантириш масалалари муҳокама қилинди.

Ташриф дастуридан Ўзбекистон–Корея бизнес-форуми ҳам ўрин олди. Унда икки мамлакат давлат идоралари ва ишбилармон доираларидан 300 дан ортиқ вакил иштирок этди. Президент Ўзбекистоннинг Lotte, Hyundai, KIA, Rotem, Shinhan, KIND ва Корея Эксимбанки каби йирик компаниялар ҳамда молия институтлари раҳбарлари билан алоҳида музокаралар ўтказди.

Бизнес-форум якунлари бўйича 12 миллиард долларлик инвестициявий ва савдо-иқтисодий лойиҳаларни амалга ошириш бўйича келишувларга эришилди. Шунингдек, Корея Эксимбанки билан 8 миллиард долларлик ҳамкорлик дастури келишиб олинди.

Ташриф давомида кимё саноати, автомобилсозлик, электротехника, полимерлар ишлаб чиқариш, тиббиёт ва робототехника соҳаларида қатор қўшма лойиҳаларга старт берилди ва уларнинг қурилиши бошланди.

Эришилган келишувлар Ўзбекистонга илғор технологияларни жалб қилиш, саноат кооперациясини кенгайтириш ва юқори технологияларга асосланган янги ишлаб чиқариш қувватларини яратишга қаратилган.

Ташриф дастури Шавкат Мирзиёевнинг «Марказий Осиё — Корея Республикаси» биринчи саммитида иштирок этиши билан давом этади. Ушбу учрашув Марказий Осиёнинг бешта давлати ва Корея Республикаси раҳбарлари иштирокидаги илк саммит бўлади. Саммит минтақалараро ҳамкорликка янада тизимли ва узоқ муддатли тус бериши кутилмоқда.