«Мураккаб тузилмалар эмас, мослашувчан формат керак». Шавкат Мирзиёев — минтақа давлатлари ҳамкорлиги ҳақида
«Бизга кучли, суверен ва мустақил давлатлар ўзаро ҳурмат, ишонч ва соғлом прагматизм асосида ҳамкорлик қиладиган мослашувчан ва тушунарли формат керак», — деди у.
Маслаҳат учрашувлари форматини яратишда «биз оддий тушунчадан келиб чиқиб иш тутган эдик: Марказий Осиёнинг фаровонлиги ва хавфсизлиги тўғридан тўғри мамлакатларимиз ўртасидаги ишончга боғлиқдир», — дея қайд этди давлат раҳбари.
Унинг сўзларига кўра, бундай ёндашув аллақачон ўз самарасини берди: минтақа халқаро майдонда анча ишончли ва кўзга кўринарли тарзда намоён бўлмоқда. «Марказий Осиё плюс» форматларига қизиқиш ортмоқда, ташқи ҳамкорлар доираси кенгаймоқда.
«Дунё тез ўзгармоқда, кескинлик ортмоқда, савдо ва транспорт алоқалари қайта қурилмоқда, янги хавф-хатарлар пайдо бўлмоқда. Бундай вазиятда ўз ҳаракатларимизни янада яқинроқ мувофиқлаштириш муҳимдир», — деди Шавкат Мирзиёев.
Қўшни минтақалар билан ҳамкорлик
У Марказий Осиё ва қўшни минтақалар ўртасидаги ҳамкорликнинг кейинги босқичини белгилаб олишни таклиф қилди.
«Амалда биз тарихий, иқтисодий ва транспорт алоқаларига эга бўлган ягона ҳамкорлик маконини шакллантиришимиз мумкин. Бугун уларни янада мустаҳкамлаш ва аниқ мазмун билан бойитиш имконияти пайдо бўлмоқда», — деди президент.
«Бу ерда сўз мамлакатларимиз биргаликда савдо, транспорт, энергетика, саноат ва янги технологияларни ривожлантириши мумкин бўлган улкан макон ҳақида бормоқда», — дея қайд этди у.
Ҳужжатлардан кўра уларнинг ижроси муҳимроқ
Президент, шунингдек, минтақавий мулоқот таянадиган пойдеворни мустаҳкамлашга чақирди. Маслаҳат учрашувлари фаолиятининг меъёрий-ҳуқуқий базасини такомиллаштиришни давом эттириш зарурлигини таъкидлади.
«Бунда фақат ҳужжатлар сони ўз-ўзидан ҳеч нарсани ҳал қилмайди. Энг муҳими, қабул қилинган қарорлар бажарилиши ва натижа бериши керак», — дея баёнот берди Ўзбекистон раҳбари.
«Сўнгги йилларда биз кўп нарсага эришдик. Энди бу ўзгаришларни мустаҳкамлаш ва ҳамкорлигимизни келгуси ўн йилликлар давомида барқарор қилиш муҳимдир. Формула оддий: тараққиёт ва хавфсизлик йўлида бирдамлик ва ишонч», — дея урғулади у.
«Биз келгуси авлодларга қандай минтақа қолдиришимиз учун жавобгармиз. У тинч, хавфсиз, иқтисодий жиҳатдан кучли бўлиши ва одамларга муносиб яшаш, меҳнат қилиш, ўқиш ҳамда фарзандларни вояга етказиш имкониятларини бериши керак», — деди Шавкат Мирзиёев.