Миллиардлар чиқиндида: нега Ўзбекистонда чиқинди муаммоси сақланиб қолмоқда?
Олий Мажлис Қонунчилик палатаси чиқиндиларни бошқариш ва циркуляр иқтисодиётни ривожлантириш агентлиги директори Ш. Ҳасановга парламент сўрови юборди. Депутатлар маиший чиқиндилар билан ишлаш, циркуляр иқтисодиётни ривожлантириш ҳамда чиқиндиларни йиғиш ва олиб чиқиб кетиш хизматлари учун тўлов тизимини такомиллаштириш бўйича маълумот сўради. Бу ҳақда парламент қуйи палатаси ахборот хизмати хабар берди.
Ўзбекистонда 2019–2028 йилларга мўлжалланган қаттиқ маиший чиқиндилар билан ишлаш стратегияси тасдиқланган. Шунингдек, соҳани ривожлантиришга қаратилган қатор президент фармонлари ва қарорлари қабул қилинган.
Маиший чиқиндиларни йиғиш ва олиб чиқиб кетиш билан шуғулланувчи ташкилотларнинг моддий-техник базасини мустаҳкамлаш учун 386,5 миллиард сўм инвестиция йўналтирилган.
Бундан ташқари, Тошкент шаҳри ва олти вилоят — Тошкент, Қашқадарё, Самарқанд, Фарғона, Андижон ва Наманган вилоятларида умумий қиймати 933 миллион доллардан ортиқ бўлган лойиҳалар амалга оширилмоқда. Улар чиқиндиларни қайта ишлаш, жумладан, ёқиш орқали электр энергияси ишлаб чиқаришни назарда тутади.
Бироқ депутатларнинг ҳудудларда ўтказган ўрганишлари соҳада қатор муаммолар сақланиб қолаётганини кўрсатмоқда. Хусусан, чиқинди полигонларини рекультивация қилиш ишлари кечикмоқда. Айрим полигонлар эса экологик меъёрлар, санитария талаблари ва ёнғин хавфсизлиги қоидаларига жавоб бермайди.
Маиший чиқиндиларни йиғиш ва олиб чиқиб кетиш хизматлари сифати ҳам эътирозларга сабаб бўлмоқда. Фуқаролар ушбу хизматлардан норозилик билдирмоқда.
В. Новиков