Нодирбек Абдусатторов NAVI билан шартномасини узайтирди

Ўзбекистонлик таниқли шахматчи Нодирбек Абдусатторов Украинанинг машҳур Natus Vincere (NAVI) киберспорт клуби билан ҳамкорликни давом эттиради.

Клуб расмий сайтида эълон қилинишича, ўзбекистонлик гроссмейстер билан шартнома узайтирилган. Шу тариқа, Абдусатторов 2027 йилда ҳам NAVI шарафини ҳимоя қилади.

Эслатиб ўтамиз, Нодирбек 2025 йил февраль ойида мазкур клуб сафига қўшилган эди. Шу вақтдан буён у NAVI номидан икки марта Esports World Cup мусобақасида иштирок этиб, ҳар иккала турнирда ҳам 5–8-ўринларни эгаллаган.

Энди ҳамюртимиз 2027 йилда ҳам клуб таркибида халқаро шахмат мусобақаларида қатнашишни давом эттириши кутилмоқда. Жумладан, у навбатдаги Esports World Cup турнирида ҳам NAVI шарафини ҳимоя қилиши мумкин.