Пневмококк инфекцияси: 5 ёшгача бўлган болалар ўртасидаги ўлимнинг асосий сабабчиларидан бири

Пневмококк инфекцияси — бу пневмококк бактериялари келтириб чиқарадиган юқумли касалликлар гуруҳи бўлиб, асосан 2 ёшгача бўлган болаларда жуда оғир кечади. Бунинг сабаби кичик ёшдаги болалар организмида бактерияларга қарши етарли миқдорда антителалар (ҳимоя барьери) ҳали шаклланмаганидир.

Касаллик бемор ёки бактерия ташувчидан ҳаво-томчи йўли орқали (йўталганда ва акса урганда) юқади. У кўпинча грипп ва бошқа ўткир респиратор вирусли инфекцияларнинг асорати сифатида ривожланади.

Пневмококк келтириб чиқарадиган асосий хасталиклар ва статистика:

• БАРЧА ЗОТИЛЖАМ (пневмония) касалликларининг 70 фоизини;
• Отит (қулоқ яллиғланиши) касалликларининг қарийб 25 фоизини;
• Йирингли менингитларнинг 5–15 фоизини;
• Эндокардитларнинг 3 фоизга яқинини келтириб чиқаради.

Шунингдек, пневмококк синусит, бронхит, артрит, сепсис ва конъюнктивит каби хавфли асоратларга сабаб бўлади. Барча турдаги пневмококк инфекциялари учун иситма кўтарилиши ва совқотиб қалтираш хос аломатдир.

Касалликнинг олдини олиш ва эмлашнинг аҳамияти: Пневмококк инфекциясини олдини олишнинг энг самарали ва хавфсиз йўли — бу конъюгирланган пневмококк вакцинаси билан оммавий эмлашдир.

• Самарадорлиги: Оммавий эмлаш болалар ўртасида пневмонияни 80 фоизга, отит касаллигини эса учдан бир қисмга камайтиради. 6 ойгача бўлган болаларда икки дозали вакцинация ўтказилганда, 87% дан 100% гача болаларда мустаҳкам иммунитет шаклланади.
• Хавфсизлиги: Вакцина мутлақо хавфсиз бўлиб, оғир ножўя таъсирлар қайд этилмаган. Эмланганларнинг 10 фоизида фақат укол ўрнида енгил оғриқ ва 1 фоиздан камроқ ҳолатда енгил иситма кузатилиши мумкин.

Жаҳон соғлиқни сақлаш ташкилоти (ЖССТ) маълумотларига кўра, ушбу вакцинани глобал қўллаш 2030 йилга бориб 5,4 миллиондан 7,7 миллионгача болалар ҳаётини сақлаб қолиш имконини беради.