Карлсен Абдусатторов билан машғулотлар унга қандай таъсир қилганини айтди

Шахмат бўйича жаҳоннинг собиқ чемпиони Магнус Карлсен ўзбекистонлик гроссмейстер Нодирбек Абдусатторов билан ўтказган машғулотлари ҳақида гапирди.

Норвегиялик шахматчи 7 ноябрь куни UNICEF учун ташкил этилган хайрия жонли эфирида Абдусатторов билан ўйнаш унга фойдали бўлганини таъкидлади.

«Дунёнинг энг кучли шахматчиларидан бири билан ўйнаганингда, бироз реалликка қайтасан», — деди Карлсен.

Унинг айтишича, интернетда кўплаб блиц партияларини ўйнаш айрим салбий одатларни шакллантиради. Нодирбек билан машғулотлар эса улардан халос бўлишга ёрдам берган. Шунингдек, ўзбекистонлик гроссмейстер Карлсеннинг ўғлида ҳам яхши таассурот қолдирган.

Карлсен юришларининг қарийб 90 фоизини интуиция асосида танлашини, одатда бир ёки икки-учта вариантни ҳисоблашини билдирди.

Шахматчи янги Total Chess форматига ҳам тўхталиб, уни қизиқарли, бироқ бироз хавотирли деб баҳолади.

Шунингдек, у Туркияда ўтказиладиган рапид ва блиц бўйича жаҳон чемпионатида қатнашиш эҳтимоли юқори эканини, аммо ҳозирча якуний қарор қабул қилмаганини айтди.

Карлсен Лондон тизими дебюти аввал ўйлаганидан анча бой ва мураккаб эканини ҳам таъкидлади.