Ботир Парпиев маҳалла вазири маслаҳатчиси бўлди

Ҳукумат қарори билан Ботир Парпиев маҳалла ва нуронийларни қўллаб-қувватлаш вазири маслаҳатчиси этиб тайинланди. Унинг лавозими мақом бўйича вазир ўринбосари лавозимига тенг.

Ботир Раҳматович Парпиев маҳалла ва нуронийларни қўллаб-қувватлаш вазири маслаҳатчиси этиб тайинланди, деб хабар берди Маҳалла вазирлиги матбуот хизмати «Газета.uz»га.

Вазирлик маълумотларига кўра, маслаҳатчи лавозими мақом бўйича вазир ўринбосари лавозимига тенглаштирилган.

Ботир Парпиев (1946 йилда туғилган) 2002 — 2004 йилларда Ўзбекистон Давлат божхона қўмитаси раиси, ундан аввал эса ички ишлар вазири ўринбосари (1998 — 2002) ва фавқулодда вазиятлар вазири лавозимларида ишлаган. 2004 — 2018 йилларда Давлат солиқ қўмитасини бошқарган.

Сўнгра Фуқароларнинг ўзини ўзи бошқариш органлари фаолиятини мувофиқлаштириш бўйича Республика кенгаши раисининг кексалар ва фахрийлар ишлари бўйича ўринбосари, шунингдек, маҳалла ва оилани қўллаб-қувватлаш вазири ўринбосари (вазирлик қайта ташкил этилгунга қадар) лавозимларида ишлаган.