Бухоро нефтни қайта ишлаш заводи томонидан AИ-80 бензиннинг суткалик ишлаб чиқариш ҳажми 2800 тоннага оширилмоқда
Суюлтирилган газ 14 532 тоннадан 15 700 тоннага оширилмоқда.
Мамлакат истеъмолчиларини АИ — 80 русумли автобензин ва суюлтирилган газ билан узлуксиз таъминлаш мақсадида Бухоро заводида корхона ва ишлаб чиқариш цехлари раҳбарларидан “Тезкор штаб” тузилди.
Корхонада товар бензинлари ва суюлтирилган углеводород гази ишлаб чиқарилишини оширишга қаратилган ишлар тезкорлик билан амалга оширилмоқда. Бензин ишлаб чиқариш қурилмаси лойиҳа қувватини 100 фоиздан 115 фоизга оширди.
Бухоро нефтни қайта ишлаш заводида декабрь ойида қайта ишлаш ҳажмларини оширишда импорт хом ашёлари улуши ҳам 30 фоизгача оширилди.
Ўз навбатида, Республика ички бозорида нефть-газ маҳсулотларига ортиб бораётган талабни қондириш мақсадида ишлаб чиқарилган суюлтирилган газни истеъмолчиларга етказиб бериш нафақат темир йўл вагонлари, балки юк ташувчи автоцистерналарда ҳам амалга оширилмоқда.