Ўзбекистонда 31 мингта уйларнинг фасад қисми реновация асосида базальт қопламага ўтказилади

Бош вазир Абдулла Арипов ўтказган йиғилишда икки ой ичида тегишли дастур лойиҳасини Вазирлар Маҳкамасига киритиш топширилди.

Ўзбекистонда 31 мингта уйларнинг фасад қисми реновация асосида босқичма-босқич базальт қопламага ўтказилади. Бу ҳақда 23 январь куни бош вазир Абдулла Арипов бошчилигида ўтказилган давом этаётган аномал совуқ ҳаво шароитида амалга оширилиши лозим бўлган вазифалар муҳокамасига бағишланган видеоселектор йиғилишида маълум қилинди.

Маълум қилинишича, республика бўйича жами 40 мингта кўп қаватли уй-жой мавжуд бўлса, шундан 31 мингга яқини 1991 йилгача қурилган.

Шу боис, Қурилиш ва уй-жой коммунал хўжалиги вазирлиги Қорақалпоғистон Республикаси, вилоятлар ва Тошкент шаҳар ҳокимликлари билан биргаликда икки ой муддатда ушбу 31 мингта уйларнинг фасад қисмини реновация асосида босқичма-босқич базальт қопламага ўтказиш ҳамда муқобил энергия манбаларидан фойдаланган ҳолда иссиқ сув ва электр билан таъминлашни назарда тутувчи дастур лойиҳасини Вазирлар Маҳкамасига киритиши топширилди.

Шу билан бирга, Қурилиш ва уй-жой коммунал хўжалиги вазирлиги эндиликда янгидан қуриладиган кўп қаватли уйлар ва ижтимоий соҳа объектларининг лойиҳа-смета ҳужжатларига энергия самарадорлик даражаси юқори бўлган қурилиш материаллари ва жиҳозлардан фойдаланишни мажбурий тартибда киритиши топширилди.