Қозоғистонда янги туғилган болаларга ҳисоб рақам очилиб, унга давлат қазилма бойликлари даромадларидан пул бериш тизими ишга тушади

Бола туғилиши билан унга банк ҳисоб рақами очилади. Бола 18 киргунича ҳисоб рақамига пул ўтказиб турилади.

Қозоғистонда давлатнинг табиий ресурсларини қазиб олишдан тушадиган даромадларнинг бир қисми янги туғилган болаларга бериб борилади. Бу «Болалар миллий жамғармаси» лойиҳаси доирасида амалга оширилади, дея хабар берган мамлакат молия вазири ўринбосари Даурен Темирбеков.

Қайд этилишича, банк ҳисоб рақамлари бола туғилгандан сўнг дарҳол автоматик тарзда очилади. Ҳисобни тўлдириш ҳар йили 1 январда, бола 18 ёшга тўлгунича ҳар йили табиий ресурсларни қазиб олишдан олинган маблағлар ҳисобидан тўлдирилади.

Ҳисобдаги пул маблағларини фақат вояга этганидан кейин ишлатиш мумкин бўлади. Ҳисобдаги маблағлар солиқдан озод қилинади. Ҳисобдан тўловлар долларда ва фақат мақсадли эҳтиёжлар учун — таълим ёки уй-жой сотиб олиш учун амалга оширилади.

Шу билан бирга, хорижий таълим муассасасида ўқиш учун тўловни амалга ошириш учун маблағлардан фойдаланишни чекламаслик кўзда тутилган. Ўз навбатида, уй-жой сотиб олиш учун маблағдан фойдаланишга фақат Қозоғистон ҳудудида рухсат этилади.

18 ёшга тўлгач, ҳисобдаги маблағлар 5-10 йил давомида сақланади. Агар улар талаб қилинмаса, уларни пенсия ҳисобварағига ўтказиш таклиф этилади. Бундан ташқари, бу маблағлар мерос қилиб олиниши мумкин.