Тошкент шаҳар ИИББ сўнгги 5 йилда бола ўғирлаш ҳолати содир бўлмагани, интернетда тарқалган хабарлар ўз тасдиғини топмаганини билдирди.
«Жорий йилнинг шу даврига қадар пойтахтда гўёки бола ўғирлангани ёки бола ўғирланишига қасд қилингани ҳақидаги 6 та хабар тарқалди. Ҳар бир тарқалган хабар Тошкент шаҳар ИИББ томонидан ўрганилган, лекин бирорта ҳам хабар ўз тасдиғини топмаган.
Тошкент шаҳри ҳудудида сўнгги 5 йил давомида бирорта ҳам бола ўғирланиши ҳолати содир бўлмаган. Вояга етмаганлар бедарак кетган ҳолатлар бўлган, лекин барча вояга етмаганлар топилган ва оиласига қайтарилган.
Таҳлилларга кўра, вояга етмаганлар аксарият ҳолларда оила аъзолари билан ўзаро келиша олмаганлиги, улардан хафа бўлганлиги ёки турли тазъйиқларга учраган ҳолатларда ўз хоҳиши билан уйидан чиқиб кетади. Кичик ёшдаги болалар эса уйидан адашиб қолган ҳолатларда йўқолганлиги аниқланган. Уларнинг барчаси қисқа муддат ичида топилиб, соғ-саломат ҳолатда оиласига қайтарилган», — деди Нилуфар Исаханова.
2022 йил давомида 231 нафар вояга етмаганлар бедарак кетган сифатида рўйхатга олинган бўлиб, уларнинг ёш бўйича таҳлили қуйидагича:
10 ёшгача 32 нафар,
10 ёшдан 14 ёшгача 32 нафар,
14 ёшдан 18 ёшгача 167 нафар.
Уларнинг барчаси соғ-саломат ҳолатда топилган ва оиласига қайтарилган, дея таъкидлади масъул ўз маълумотида.
© Yangiliklar24 . All Rights Reserved.