«WR Chess Masters». Нодирбек Абдусатторов 3-турда Аронянга ютқазди

Германиянинг Дюсселдорф шаҳрида шахмат бўйича нуфузли «WR Chess Masters» турнирида ҳамюртимиз кеча чиройли ғалабага эришган бўлса, бугун 3-тур доирасида Левон Аронянга қарши ўтказилган ўйинда осон мағлубиятга учради.

Қора доналарда ўйнаган ҳамюртимиз учун баҳснинг дебют қисми муваффақиятли чиқмади. Боз устига, ватандошимиз 14-юришда «F» йўлакдаги пиёдани суриб, қўпол хатога йўл қўйди. АҚШлик спортчи эса ушбу хатодан унумли фойдаланиб қолди.

Ўз навбатида Аронян ҳам 22-юришда хатога йўл қўйиб, Нодирбек учун имконият яратганди, аммо ватандошимиз бу имкониятдан фойдалана олмади. Натижада Абдусатторов 31-юришга келиб мағлубиятни тан олди.

Ушбу мағлубият ўзбекистонлик спортчининг жадвалдаги ўрнига албатта таъсир қилади. У жадвалнинг ўртароғига тушиб кетади. Абдусатторов эртага 4-тур доирасида ҳиндистонлик Праггнанадҳага қарши оқ доналарда ўйнайди.

Манба: stadion.uz