Избоскан туманига янги ҳоким тайинланди

Аброрбек Қосимжонович Аҳмадалиев Андижон вилояти Избоскан тумани ҳокими лавозимига тайинланди, дея хабар бермоқда вилоят ҳокимлиги.

Аброр Аҳмадалиев 1988 йилда Избоскан туманида туғилган. 2012 йилда Андижон машинасозлик институтини тамомлаган.

Меҳнат фаолияти давомида Андижон вилояти иқтисодиёт бош бошқармаси 1-тоифали мутахассиси, Андижон вилояти ҳокимлиги ахборот-таҳлил хизмати бош мутахассиси, молия-иқтисодиёт ва камбағалликни қисқартириш масалалари бўйича котибиятининг мудири, Андижон вилояти Камбағалликни қисқартириш ва бандлик бошқармаси бошлиғининг ўринбосари — Маҳаллабай ишлаш ва тадбиркорликни ривожлантириш бошқармаси бошлиғи вазифаларида фаолият олиб борган.

У мазкур лавозимга тайинлангунига қадар вилоят Бандлик бошқармаси бошлиғи лавозимида фаолият юритаётган эди. Аҳмадалиев янги лавозимда 2023 йилда тайинланган Элёрбек Каримов ўрнини эгаллади. Ундан аввал ҳудудни 5 йил давомида бошқариб келган Серобиддин Исмоилов мансаб ваколатини суиистеъмол қилиш ва ер бериш тартибини бузишда айбланиб қамоққа олинганди.