Президент сайловини ўтказиш учун 174 миллиард сўмдан ортиқ маблағ йўналтирилади

Тегишли қарор Ўзбекистон Марказий сайлов комиссиясининг мажлисида қабул қилинди.

Марказий сайлов комиссияси жорий йил 9 июль куни бўлиб ўтадиган Ўзбекистон Республикаси президенти сайловига тайёргарлик кўриш ва уни ўтказиш билан боғлиқ харажатлар сметасини ишлаб чиқди. Бу ҳақда МСКнинг навбатдаги йиғилишида маълум бўлди.

Шундай қилиб, сайлов билан боғлиқ бўлажак тадбирларга 174 миллиард 130 миллион сўм миқдорида маблағ йўналтирилади.

МСК аъзоси Адҳам Ибодуллаевга кўра, бу аввалги президентлик сайловлари учун ажратилган маблағдан 41 фоизга кам. Ҳисоб-китобларга кўра, маблағларнинг қарийб 82 фоизи округ ва участка сайлов комиссиялари фаолиятини ташкил этишга йўналтирилади.

Ушбу маблағларнинг 76 фоизи округ ва участка сайлов комиссиялари аъзоларига (уларнинг асосий қисми ўқитувчилар, шифокорлар ва кўнгиллилар) тўловларга йўналтирилиши режалаштирилган.

Шунингдек, 2021 йилда бўлиб ўтган президент сайловида бюджет иқтисодлари 26 фоизни, жорий йилда бўлиб ўтган конституциявий референдумда эса 13,5 фоизни ташкил этгани қайд этилган.