Тошкент вилоятидаги мактабда виртуал лаборатория ишга туширилди

Ўқувчилар «Интерактив таълим VR» дастури доирасида кимёвий лабораторияларни виртуал шаклда олиб боришади.

Тошкент вилояти Оҳангарон тумани «Қорахитой» маҳалласидаги 12-умумтаълим мактабнинг кимёғ-лаборатория хонасига «Интерактив таълим VR» дастури жорий қилинди.

Қайд этилишича, мактаб ўқитувчилари ва ўқувчилари билан бирга биринчи дарслик синовдан ўтказилди. Кейин лойиҳанинг моҳияти, афзалликлари ўқувчиларга тушунтирилди. Эндиликда кимё фанидан лаборатория ишларида ўқувчилар кимёвий моддалар билан тўғридан-тўғри ишлаши шарт эмас. Ҳаммаси виртуал шаклда олиб борилади, яъни мутлақо хавфсиз.

Шунингдек, ушбу дастур Тошкент вилоятида биринчилардан бўлиб мазкур мактабда ўрнатилган.

Маълумот учун, ўтган йили «Ташаббусли бюджет» лойиҳасининг 2-мавсумида 12-умумтаълим мактаби жамоаси мактабни замонавий технологиялар билан жиҳозлаш лойиҳасини порталга жойлаштириб, овоз йиғиш натижаларига кўра ғолиб деб топилганди. Бюджетнинг орттириб бажарилган қисмидан мазкур лойиҳа учун жами 1,2 млрд сўм маблағ ажратилиб, ушбу маблағга турли инновацион технологиялар олиб келинди.