Жиззахда 820 кг еб бўлмайдиган гўшт Тошкентга сотиш учун олиб келинаётгани аниқланди

Гўшт Қашқадарёдан олиб келинаётганда, Жиззахда тўхтатиб қолинган.

Жиззах вилояти ИИБ Матбуот хизматининг хабарига кўра, жорий йилнинг 3 июнига ўтар кечаси Ғаллаорол тумани ҳудудидаги ЙПХ масканида Қашқадарё-Тошкент йўналишида шубҳали ҳаракатланиб келаётган Cobalt тўхтатилиб, текширилган.

Аниқланишича, Қашқадарё вилояти Чироқчи туманида яшовчи 1982 йилда туғилган фуқаро бошқарувидаги автомобиль салонида гўштлар ветеринария ва санитария қоидаларига зид равишда олиб кетилаётган бўлган.

Қайд этилишича, ҳайдовчи ушбу гўштларга оид ҳеч бир ҳужжатни тақдим қилолмаган. Шунингдек, у гўштни Қашқадарёдан Тошкент шаҳрига сотиш мақсадида олиб кетаётганини маълум қилган.

ИИО ходимлари томонидан жами 820 кг гўшт ҳужжатлаштирилиб, лабораторияга юборилган. Лекин, текширувлардан сўнг, гўштлар истеъмолга яроқсиз экани аниқланган. Шундан сўнг, ушбу гўштлар тегишли тартибда ёқиб юборилган.