Ички ишлар вазирлиги Литва компаниясидан 44 миллиард сўмлик планшетлар сотиб олади

Янги жиҳозлар ҳуқуқбузарликлар профилактикаси инспекторлари, патруль-пост хизмати ходимлари ва бошқа хизматлар томонидан қўлланилади.

Республика товар-хом ашё биржаси портали — (UzEX Tender)да Ички ишлар вазирлиги эҳтиёжлари учун планшетлар харид қилиш бўйича ўтказилган тендер натижалари эълон қилинди.

Ҳужжатдан кўриниб турибдики, Ички ишлар вазирлиги ҳуқуқбузарликлар профилактикаси инспекторлари, патруль хизмати ходимлари ва бошқа хизматлар учун 7 минг дона планшет сотиб олади.

Ушбу ускуналар:

— маъмурий баённомаларни рўйхатдан ўтказиш;

— қидирувда бўлган фуқаролар ва ўғирланган транспорт воситаларининг мавжуд маълумотлар базасига тезкор кириш;

— қидирувда бўлган шахслар асосида шахсни аниқлаш;

— Ички ишлар вазирлигининг маълумотлар базасига киришни таъминлаш;

— матнли ҳужжатлар, фотосуратлар ва видеолар, овозли файлларни юборишда фойдаланилади.

Қайд этилишича, тендернинг бошланғич баҳоси 53,7 миллиард сўмни ташкил қилган. Тендерда Start Group (Литва) ғолиб бўлган ва у энди 3,61 миллион еврога (44,6 миллиард сўм) планшетлар етказиб беради.