Тошкентда салкам 29 млрд сўмлик этил спиртини сотиб юборган иккита МЧЖ раҳбари ушланди

Улар антисептик ишлаб чиқариш учун харид қилинган 1,5 тоннадан кўпроқ этил спиртини пуллаб юборган.

Бош прокуратура департаменти хабарига кўра, “M.T.” МЧЖ масъул шахслари антисептик ва лосьон ишлаб чиқариш учун этил спирти ишлаб чиқарувчи корхоналардан харид қилинган 19,4 млрд сўмлик 1 153 тонна этил спиртидан ушбу маҳсулотларни ишлаб чиқармасдан, ҳужжатларга гўёки антисептик ва лосьон маҳсулотлари сотилганлиги тўғрисида сохта маълумотлар тайёрлаб, этил спиртини бошқа шахсларга нақд пулга сотиб юборганликлари аниқланган.

Шу каби, “M.W.” МЧЖ масъул шахслари этил спирти ишлаб чиқарувчи корхоналардан антисептик ишлаб чиқариш учун харид қилган 8,9 млрд сўмлик 402,6 тонна этил спиртини сотиб юборганликлари аниқланган.

Мазкур ҳолатлар юзасидан ЖКнинг 186-1-моддаси (этил спирти, алкоголли маҳсулот ва тамаки маҳсулотини қонунга хилоф равишда ишлаб чиқариш ёки муомалага киритиш) ва 228-моддаси (ҳужжатлар, штамплар, муҳрлар, бланкалар тайёрлаш, уларни қалбакилаштириш, сотиш ёки улардан фойдаланиш) билан жиноят ишлари қўзғатилиб, тергов ҳаракатлари ўтказилмоқда.