Олий Мажлис палаталари Кенгашларининг қўшма мажлиси ўтказилди

Жорий йилнинг 13 февраль куни Ўзбекистон Республикаси Олий Мажлиси Сенати Кенгаши ва Қонунчилик палатаси Кенгашининг қўшма мажлиси бўлиб ўтди. Унда Олий Мажлис палаталари Кенгашлари аъзолари, депутатлар, сенаторлар ва оммавий ахборот воситалари вакиллари иштирок этди.

Кун тартиби тасдиқлангач, 2024 йилга мўлжалланган ижтимоий-иқтисодий ривожланишнинг устувор йўналишлари бўйича белгиланган тадбирларнинг бажарилиши устидан парламент назоратини амалга ошириш тўғрисидаги масала муҳокама қилинди.

Таъкидланганидек, кейинги йилларда мамлакатимизда ижтимоий-иқтисодий ривожланиш, хусусан макроиқтисодий барқарорлик ва иқтисодий ривожланишни таъминлаш, инвестиция, экспорт ҳажмларини кенгайтириш, қишлоқ хўжалиги, уй-жой қурилиш, коммунал хўжалиги, транспорт, экология соҳаларини, шунингдек таълим, соғлиқни сақлаш, рақамлаштириш, маданият ва спортни ривожлантириш бўйича кенг кўламли чора-тадбирлар амалга оширилмоқда.

Мамлакатимиз Президентининг фармонлари ва қарорларида мазкур йўналишларда олиб борилаётган ислоҳотлар самарадорлигини оширишга доир қатор устувор вазифалар белгилаб берилган.

Муҳокамалар жараёнида 2024 йилга мўлжалланган ижтимоий-иқтисодий ривожланишнинг устувор йўналишлари бўйича белгиланган тадбирларнинг бажарилиши устидан тизимли парламент назоратини йўлга қўйиш, бу борада Олий Мажлис палаталари ҳамда халқ депутатлари маҳаллий Кенгашларининг фаол иштирокини таъминлаш масалаларига эътибор қаратилди.

Кун тартиби доирасида Олий Мажлис ҳузуридаги Нодавлат нотижорат ташкилотларини ва фуқаролик жамиятининг бошқа институтларини қўллаб-қувватлаш жамоат фонди маблағларини бошқариш бўйича парламент комиссиясининг 2023 йилдаги фаолияти кўриб чиқилди.

Парламент комиссияси томонидан Давлат бюджетидан 2023 йил учун ажратилган жами 226 млрд 490 млн сўм маблағни давлат субсидияси шаклида 191 млрд 490 млн сўм, давлат ижтимоий буюртмаси шаклида 18 млрд сўм ва давлат гранти шаклида 17 млрд сўм миқдорида молиялаштириш тўғрисида қарор қабул қилинган.

Олий Мажлис ҳузуридаги жамоат фонди томонидан 38 та нодавлат нотижорат ташкилотининг устав фаолияти ва йиллик иш режаси ижросига жами 123 млрд 338 млн сўм, Қорақалпоғистон Республикаси Жўқорғи Кенгеси, халқ депутатлари вилоятлар ва Тошкент шаҳар Кенгашлари ҳузуридаги нодавлат нотижорат ташкилотларини ва фуқаролик жамиятининг бошқа институтларини қўллаб-қувватлаш жамоат фондларига қўшимча давлат субсидияси шаклида қўллаб-қувватлаш учун 68 млрд 152 млн сўм йўналтирилган.

Шунингдек, Парламент комиссияси қарорлари асосида Давлат бюджети ҳисобидан “Нуроний” жамғармасига 35 млрд 182 млн сўм ва Прогрессив ислоҳотлар марказига 6 млрд 500 млн сўм қўшимча давлат субсидияси шаклида маблағ йўналтирилган.

Бундан ташқари, Парламент комиссиясининг қарорига асосан Жамоат фонди томонидан 2023 йилда давлат грантларининг 6 та танлови ўтказилган ва 200 та лойиҳа 18 млрд сўмга молиялаштирилган.

2023 йил давомида давлат органларининг таълим сифатини ошириш, соғлиқни сақлаш, энергия ресурсларидан оқилона фойдаланиш, қурилиш, коммунал хўжалиги, камбағалликни қисқартириш ва бандлик каби соҳаларда жамоатчилик назоратини кучайтиришга йўналтирилган буюртмалари асосида Парламент комиссияси қарорига мувофиқ Жамоат фонди томонидан 11 та ижтимоий буюртмага очиқ танловлар эълон қилинган.

Муҳокамалар чоғида соҳалар кесимида тегишли давлат органлари ва бошқа ташкилотлар билан ҳамкорликда муайян ижтимоий-иқтисодий масалаларни ҳал этишга қаратилган ижтимоий аҳамиятга молик лойиҳалар ҳажмини босқичма-босқич ошириб бориш, ўтказиладиган танловларнинг барча босқичларини рақамлаштириш орқали шаффоф ва соғлом рақобат муҳитини яратиш лозимлиги таъкидлаб ўтилди.

Шунингдек, қўшма мажлисда Ўзбекистон Республикаси Олий Мажлисининг Миср Араб Республикаси парламенти билан ҳамкорлик бўйича парламентлараро гуруҳининг янги таркибини тасдиқлаш тўғрисидаги масала ҳам кўриб чиқилди.

Мажлисида муҳокама қилинган барча масалалар юзасидан Олий Мажлис Сенати ва Қонунчилик палатаси Кенгашларининг қўшма қарорлари қабул қилинди.