Теннис. Максим Шин бош совринни Тошкентда олиб қолмоқчи

Пойтахтимиздаги “Saxovat sport servis” спорт мажмуасида Халқаро теннис федерациясининг расмий тақвимига киритилган М15 тоифасига кирувчи халқаро турнирда ёш теннисчимиз Максим Шин муваффақиятли иштирок этмоқда.

Мусобақанинг яккалик баҳсларида М.Шин биринчи ва иккинчи даврада нейтрал теннисчилар Алексей Алешчев ҳамда Максим Жуковни таслим қилди ва чорак финалга чиқди. Энди Максим ярим финал остонасида ҳиндистонлик Криш Тяги билан куч синашади.

Шунингдек, Максим Шин италиялик шериги Лорензо Лоруссо билан биргаликда халқаро турнирни ярим финалига чиқди ва ушбу босқичда нейтрал мақомдаги теннисчи Александр Лобанов ва ҳиндистонлик Каран Сингх жуфтлигига қарши ўйнайдиган бўлди.

Қувонарлиси, жуфтлик беллашувларининг иккинчи ярим финалида икки ўзбек теннисчиси – Илья Игнатов ва Амир Милушев тандеми Ҳиндистон вакиллари Ишакию Эқбал ва Нитин Кумур Синха дуэтига қарши баҳс олиб боради.

Умид қиламизки, мазкур учрашувларда теннисчиларимиз ғалаба қозонади ва финал баҳси ўзбек теннисчилари иштирокида ўтади.