Шахмат. Жавоҳир Синдоров онлайн рейтингда дунёнинг 3-рақамли шахматчисига айланди

Ўзбекистонлик гроссмейстер Жавоҳир Синдоров ФИДE онлайн рейтингида бир поғона кўтарилиб, дунёнинг 3-рақамли шахматчисига айланди. Бунга америкалик Фабиано Каруананинг 3,7 очко йўқотиши сабаб бўлди. Эндиликда Синдоров 2782 очко билан учинчи, 2780,3 очкога эга Каруана эса тўртинчи поғонада.

Яна бир ўзбекистонлик шахматчи Нодирбек Абдусатторов эса (2780 очко) 5-ўринни банд этиб турибди.

Рўйхатда норвегиялик Магнус Карлсен 2823 очко билан биринчи ўринни сақлаб қолди. Иккинчи ўринга 2792 очко билан АҚШ вакили Ҳикару Накамура жойлашган.

Аввалроқ Ўзбекистон 46-бутунжаҳон шахмат олимпиадасида ғолибликни қўлга киритгач, Жавоҳир Синдоров ўз очколарини 2778 дан 2782 тага етказиб олган эди. Нодирбек Абдусатторов эса мусобақада кўрсатган юқори даражадаги ўйинлари сабабли 17,5 очко жамғарган ва ўтган ойдаги 7-ўриндан 5-поғонага кўтарилган эди.

Шунингдек, Ўзбекистон терма жамоасининг олимпиада ғолибига айланишига муносиб ҳисса қўшган Нодирбек Ёқуббоев ўз кўрсаткичини 26,7 очкога яхшилаган ва 2712 очко билан 26-ўринга кўтарилишга муваффақ бўлган эди. У онлайн рейтингда 25-поғонада.