Теннис. Акмал Абдуллаев Олмотада Roland Garros Junior Series финалига чиқди

Қозоғистоннинг Олма-ота шаҳридаги Gorky Tennis Park кортларида 4-9 август кунлари Франция теннис федерацияси (FFT), Осиё теннис федерацияси (ATF) ва Renault Group ҳомийлигида ўтказилаётган 16 ёшгача бўлган ўйинчилар учун нуфузли турнир — Roland Garros Junior Series by Renault мусобақасининг саралаш босқичи ғолиблари аниқланди.

Ёрқин ярим финалда ўзбекистонлик теннисчи Акмал Абдуллаев қозоғистонлик Ансар Ниеткалиевни 7-6 (3), 6-3 ҳисобида мағлуб этиб, турнирнинг ҳал қилувчи ўйинига йўл олди. Абдуллаев шу тариқа Японияда бўлиб ўтадиган Roland Garros Junior Series by Renault саралашининг якуний босқичида иштирок этиш ҳуқуқини қўлга киритди.

Ўзбекистоннинг яна бир вакили Алан Зинатулин қаттиқ курашдан сўнг қозоғистонлик Мансур Саиновга 4-6, 6-7 (7) ҳисобида енгилди. Энди у мусобақанинг учинчи ўрни учун беллашади.

Ўзбекистон теннис федерацияси матбуот хизмати