UFC. Богдан Гуськовнинг навбатдаги рақиби маълум бўлди

Ўзбекистонлик UFC жангчиси Богдан Гуськовнинг навбатдаги рақиби маълум бўлди. Спортчининг мураббийи Гор Азизяннинг маълум қилишича, Гусков собиқ чемпион, ярим оғир вазн тоифасида жанг қилувчи польшалик Ян Блаховичга қарши октагонга чиқади.

Блахович ярим оғир вазн тоифасида жанг қиладиган спортчилар рейтингида 5-ўринни эгаллаб турибди. Гуськов эса 10-поғонада жой олган.

Богдан сўнгги жангини жорий йилнинг июл ойида, UFC оn АB 9 турнирида ўтказган эди. У россиялик Никита Криловга қарши жанг қилган ва биринчи раунддаёқ нокаут орқали ғалаба қозонганди. Ҳозирда Гуськовнинг ҳисобида 18 ғалаба ва 3 мағлубият бор.

Блахович эса охирги бор март ойида, UFC Fight Night 255 турнирида Карлос Улбергга қарши октагонга чиқиб, ҳакамлар қарорига кўра мағлуб бўлган эди. У умумий ҳисобда 41 та жанг ўтказган бўлиб, 29 та ғалаба, 11 та мағлубият ва 1 та дуранг натижа қайд этган.

Манба: daryo.uz