Ўзбекистон ва АҚШ муносабатлари барқарор босқичга етди — Абдулазиз Камилов
Унинг сўзларига кўра, мамлакатлар ўртасидаги муносабатлар икки шартли босқичдан ўтган. 2017 йилгача ҳамкорлик «етарлича барқарор бўлмаган» ва асосан хавфсизлик ва Афғонистон масалалари билан чекланган эди. «Савдо-иқтисодий ёки инвестиция соҳасидаги ҳамкорликка келсак, афсуски, бу борада сезиларли натижаларга эриша олмаганмиз», — деб таъкидлади у.
2017 йилда президент Шавкат Мирзиёевнинг ҳокимиятга келиши билан АҚШ билан янги босқич бошланди.
«Президентимизнинг 2018 йилда Вашингтонга амалга оширган расмий ташрифи стратегик шерикликнинг янги даврини бошлаб берди. Ва бу босқич ҳамкорлигимизнинг деярли барча мумкин бўлган соҳаларини қамраб олган кенг қамровли кун тартибини шакллантириш билан тавсифланади. Бу сиёсат, бу иқтисодиёт, бу гуманитар ҳамкорлик, бу таълим ва табиийки, минтақавий хавфсизлик масалалари», — деди Камилов.
Президент маслаҳатчиси айтишича, Америка элитасининг деярли барча вакиллари, жумладан, сиёсий доиралар ва бизнес вакиллари мамлакатлар ҳамкорликнинг янги босқичи бошланаётганини тан олмоқда.
«Келажакдаги ҳамкорлигимизнинг стратегик жиҳатлари муҳокама қилинган икки президент ўртасидаги ушбу музокараларнинг асосий натижаси шундаки, муносабатлар барқарорлик ва прогноз қилиш мумкин бўлган босқичига ўтди», — деди Камилов.
Шунингдек, у Шавкат Мирзиёевнинг БМТ Бош ассамблеясида билдирган ташаббуслари мамлакат миллий манфаатларига асослангани ва глобал аҳамият касб этаётганини таъкидлади.
«Ташаббус ва таклифлар, улар Ўзбекистон Республикасининг ҳаётий муҳим миллий давлат манфаатларига бевосита алоқадор. Нега улар глобал? Чунки Ўзбекистон атрофидаги минтақада мавжуд бўлган бир қатор чақириқ ва таҳдидлар, хавф-хатарларни фақат кенг халқаро ва ҳатто глобал даражада ҳал қилиш мумкин», — деди Камилов.
У президент хавфсизлик, экология, Орол денгизи тақдири ва ёшлар масалаларини устувор йўналишлар қаторида кўрсатаётганини таъкидлади.
«Шундан келиб чиқиб, президент ушбу глобал ташаббусларни илгари сурди. Унинг диққат марказида биринчи навбатда Ўзбекистон, Ўзбекистон ва яна бир бор Ўзбекистон,» — деди маслаҳатчи.
Gazeta аввалроқ экспертлардан БМТ ўз юбилейини қандай кутиб олаётгани, унга қандай ислоҳотлар кераклиги (ва улар керакми), шунингдек, унинг самарадорлигини ошириш учун қандай қадамлар қўйиш мумкинлиги ҳақида сўраган эди.