Богдан Гусков UFC 323 турнири доирасида собиқ чемпионга қарши жанг қилади

Ўзбекистонлик UFC жангчиси Богдан Гусковнинг навбатдаги жангини собиқ чемпион, 42 ёшли полшалик аралаш жанг санъати устаси Ян Блаховичга қарши ўтказади. Бу ҳақда UFC матбуот хизмати хабар берди.

Унга кўра, жанг 6 декабрь куни UFC 323 турнири доирасида АҚШнинг Невада штати, Лас-Вегас шаҳридаги “Т-Mobile” мажмуасида бўлиб ўтади.

Богдан Гусков охирги жангини жорий йилнинг июль ойида, Абу-Дабида бўлиб ўтган UFC он АБC 9 турнирида Никита Криловга қарши ўтказган. Мазкур баҳсда Гусков биринчи раунддаёқ рақибини нокаутга учратган эди. Ўзбекистонлик спортчи UFC промоушени доирасида ҳозирга қадар жами 5 та жанг ўтказиб, шулардан 4 мартасида ғалаба қозонган бўлса, 1 баҳсда мағлубиятга учраган.

Унинг навбатдаги рақиби 42 ёшли собиқ чемпион Ян Блахович охирги жангини март ойида ўтказган. У UFC Fight Night 255 турнирида Каролос Улбергга қарши октагонга чиқиб, ҳакамлар якдил қарори билан мағлубиятга учраган. Блахович фаолияти давомида 41 марта октагонга чиқиб, шуларнинг 29 мартасида ғалаба қозонган, 11 бор мағлуб бўлган бўлса, 1 жангда дуранг қайд этилган.

Манба: daryo.uz