«Ҳафтасига 7 кун, кунига 18−20 соат ишлайдиган ҳукуматни фақат Ўзбекистон ва Саудияда кўрдим» — ACWA Power раҳбари

Тошкент вилоятида янги халқаро аэропорт қурилиши бошланишига бағишланган маросимда нутқ сўзлаган Саудия Арабистони ACWA Power компанияси бошқаруви раиси Муҳаммад Абунайян Ўзбекистон президенти етакчилигидаги ҳукумат ва жамоа ишчанлигини эътироф этди.

У ўз нутқи аввалида Ўзбекистонда сўнгги 8 йилда амалга оширилган ишларни бошқа мамлакатлар асрлар давомида бажара олмаслигини қайд этди.

«Ростдан ҳам, бу натижаларга дунёдаги бирор етакчи эришиши жуда қийин. Мен аввал ҳам таъкидлаганман: бу даражада улкан ўзгаришларни амалга оширган етакчилардан иккисини биламан. Биринчиси — сиз, иккинчиси эса Саудия валиаҳди, бош вазир Муҳаммад бин Салмон», — деди Абунайян.

Абунайян Ўзбекистондаги барча ютуқлар президентнинг «буюк виждони ва фидойилик меҳнати» самараси эканини таъкидлади.

«Сиз бу ишларингизни халқингизни ва Ватанингизни чин дилдан севганингиз учун қилдингиз. Мен дунёнинг 24 та давлат раҳбарлари билан мулоқотда бўлдим. Лекин ўз халқини сиздек севадиган давлат раҳбарини кўрганим йўқ. Шунинг учун ҳам халқингиз ва юртингиз Сизни севади», — деди компания раҳбари.

«Мен сиз билан йигирма марта учрашганман. Ҳар бир учрашувдан олдин нутқимни тайёрлайман, нималарни айтиш кераклигини ўйлайман. Аммо ҳар гал сизнинг фикрингиз, энергиянгиз ва амалий ишларингиз бизникидан устун келади. Сиз доимо тезкор ҳаракат қиласиз, виждон билан ишлайсиз ва натижа кўрсатасиз», — дея қўшимча қилди Абунайян.

У Ўзбекистон президенти маҳаллий ва хорижий инвесторларга эътибор қаратаётгани, улар учун тенг имкониятлар яратаётганини қайд этди. Шунингдек, у президентга «бошқарув ва шаффофлик асосида» олдинги оғир меросни орқада қолдирганини ва янги тарих яратганини таъкидлади.

«Бутун дунё бугун сизни кузатмоқда, сиздан ўрганмоқда. Сизнинг етакчилигингизда ишончли ҳукумат ва фидойи жамоа куну-тун меҳнат қилмоқда. Мен ҳафтасига етти кун, кунига 18−20 соат ишлайдиган ҳукуматни фақат Ўзбекистон ва Саудияда кўрдим», — деди Абунайян.

ACWA Power раҳбари дунёдан кўп одамлар Ўзбекистонга турист сифатида ҳам, дўст сифатида ҳам, инвестор сифатида ҳам келишни хоҳлаётганини қайд этди.

У кейинги йилларда Ўзбекистон бутун дунёга ўз салоҳиятини намоён этишини, янги Ўзбекистон нималарга қодир эканини дунё кўришини маълум қилди.

«Менинг икки устозим бор: бири — валиаҳд шаҳзода, бош вазир Муҳаммад бин Салмон, иккинчиси — сиз, жаноб президент. Мен сиздан жуда кўп нарсаларни ўргандим. Сиз менинг устозимсиз», — дея нутқини якунлади Муҳаммад Абунайян.

Эслатиб ўтамиз, Янги Тошкент аэропорти қуриш лойиҳсаи давлат-хусусий шериклик асосида амалга оширилади. Хусусий шериклар Vision Invest (Саудия Арабистони), лойиҳага «ўнлаб миллиард иена» сармоя киритадиган Sojitz савдо уйи (Япония) ва Incheon International Airport Corporation (Корея Республикаси) бўлади.

Лойиҳа тўрт босқичдан иборат бўлиши кутилмоқда. Қиймати 2,5 миллиард доллар бўлган биринчи босқич аэровокзал ва аэродром қурилишини ўз ичига олади. Қурилиши тугаллангандан сўнг аэропорт йилига 20 миллион нафар йўловчи ва 129 минг тонна юк ўтказиш, соатига 30 та учиш-қўниш операцияларини бажариш, 14 та телескопик траплардан фойдаланиш ҳамда бир вақтнинг ўзида 62 та ҳаво кемасини сақлаш имкониятига эга бўлади.