Россиялик теннисчи Ўзбекистон шарафини ҳимоя қилади
Тимофеева Москвада туғилган, бироқ Словенияда шуғулланиб келади. У 2023-йилда Будапештда бўлиб ўтган WTA — 250 турнирида ғалаба қозониб, ўзининг илк совринини қўлга киритган. Тимофеева 2024-йилги Australian Open мусобақасида саралашдан ўтиб, асосий тўрда тўртинчи босқичгача етиб борган. Шунингдек, у Маями ва Будапешт турнирларида ҳам яхши натижалар қайд этган. Мария 19 октябрь куни Португалияда бўлиб ўтган ITF турнирида (W75) чемпионликни қўлга киритди.
Ҳозирда 21 ёшли спортчи WTA рейтингида 146-ўринни эгаллаб турибди. Унинг фаолиятидаги энг юқори кўрсаткич 2024-йилда қайд этилган бўлиб, ўшанда Мария 93-ўриндан жой олган эди.
Россия теннис федерацияси раҳбари Шамил Тарпишчев йил бошида россиялик спортчилар бошқа мамлакатлар номидан турнирларда қатнашиши мумкинлигини айтган эди. Бу ҳолат Россияда мусобақаларнинг йўқлиги ва молиявий муаммолар билан боғлиқ.
Маълумот учун, 2022-йилдан бошлаб ITF Россия ва Беларусь теннис федерацияларининг аъзолигини тўхтатган ва бу давлатларда турнирлар ўтказишни тақиқлаган. Шунга қарамай, ATP ва WTA россиялик теннисчиларга нейтрал мақомда иштирок этишга рухсат берган.
Манба: daryo.uz