Ўзбекистон президенти Европа ишбилармонларини ҳамкорликни кенгайтиришга чақирди

Шавкат Мирзиёев Бельгияга расмий ташрифи доирасида Европанинг етакчи компания ва банклари раҳбарлари билан давра суҳбати ўтказди, дея хабар бермоқда Президент матбуот хизмати.

Учрашувда Vandewiele, Linde, Rhenus Logistics, Ahlers Logistics, Lasselsberger Group, Pietro Fiorentini, NextChem, Meridiam, SUEZ, FMO, European Investment Bank, Commerzbank, KfW, Textima, Chimcomplex, Metso ҳамда бошқа компания ва корпорацияларнинг раҳбарияти иштирок этди.

Давлат раҳбари тадбирда Европанинг етакчи компаниялари иштирок этаётгани ўзаро ишонч ва узоқ муддатли шерикликка интилишнинг ифодаси эканини таъкидлади.

Кенгайтирилган шериклик ва ҳамкорлик тўғрисидаги битимнинг имзоланиши Ўзбекистон ва ЕИ ўртасидаги муносабатларда янги даврни бошлаб бериши қайд этилди.

Қайд этилишича, кейинги етти йилда товар айирбошлаш икки баробар кўпайди, Европа сармояси иштирокидаги қўшма корхоналар сони мингдан ошди.

Европалик ҳамкорлар Ўзбекистон иқтисодиётини модернизация қилиш ва тубдан ислоҳ қилиш, янги технологиялар, корпоратив бошқарув стандартларини жорий этиш ҳамда инновацион ишлаб чиқаришни ривожлантиришга кўмаклашаётгани қайд этилди.

Президент инсон капиталини ривожлантириш масалаларига алоҳида эътибор қаратди. Ёшларнинг олий таълим олиш имкониятлари сезиларли даражада кенгайтирилгани таъкидланди.

Учрашувда давлат раҳбари ҳамкорликни янада чуқурлаштиришнинг тўртта муҳим йўналишини кўрсатиб ўтди.

Ўзбекистон стратегик хомашё ва минералларни ўзлаштириш ва чуқур қайта ишлаш орқали юқори қўшилган қийматли тайёр маҳсулотлар ишлаб чиқариш бўйича лойиҳаларни биргаликда амалга оширишдан манфаатдор экани қайд тилди.

«Яшил иқтисодиёт» ва кимё саноати ҳам ҳамкорлик учун истиқболли йўналишлардан экани айтилди. Ўзбекистон қайта тикланадиган энергетикани фаол жорий этаётгани, энергетика тизимини модернизация қилаётгани таъкидланди. Европалик ҳамкорларга «яшил» энергетика, энергия тежаш ва экологик кимё лойиҳаларида иштирок этиш таклиф қилинди.

Инфратузилма ва логистикани ривожлантириш ҳам устувор аҳамиятга эга экани кўрсатиб ўтилди. Ўзбекистон автомобиль йўллари, темир йўллар ва аэропортларни ўз ичига олган транспорт тармоғини модернизация қилаётгани қайд этилди. Мамлакат транзит йўналишларини ривожлантириш, Европа ва Осиёни боғлайдиган логистика марказларини барпо этиш бўйича қўшма лойиҳаларни амалга оширишга тайёр экани билдирилди.

Рақамли иқтисодиёт ва ахборот технологиялари соҳасига ҳам эътибор қаратилди. Ўзбекистон IT парклар ва стартап инкубаторларини ривожлантираётгани ҳамда Европа компаниялари билан сунъий интеллект ва киберхавфсизлик соҳаларида ҳамкорлик қилишга тайёр экани маълум қилинди.

Давра суҳбати иштирокчилари, ўз навбатида, Ўзбекистонда янги қўшма лойиҳа ва ташаббусларни амалга оширишда иштирок этишга тайёр эканини тасдиқладилар.