Ўзбекистонлик тадбиркор Рустам Мўминов ЕИ санкциялари рўйхатига киритилди

Европа Иттифоқи 23 октябрь куни қабул қилинган 19-санкциялар пакетига ўзбекистонлик тадбиркор Рустам Мўминовни ҳам киритди.

Эълон қилинган карточкага кўра, Мўминов Ўзбекистон, Россия ва Буюк Британия фуқаролигига эга.

ЕИ ҳужжатида қайд этилишича, Мўминов (1965 йилда туғилган)нинг чекловларга учраши Россия ҳарбий-саноат комплексини қўллаб-қувватлаш билан боғлиқ.

Брюсселнинг баҳолашича, у Фарғонадаги Farg‘ona Kimyo Zavodi пахта целлюлозаси заводини назорат қилади. Унинг маҳсулотлари Пермь ва Қозон порох заводларига етказиб берилиши айтилмоқда. Бу материаллар Россия қуролли кучлари учун қурол ишлаб чиқаришда ишлатилган бўлиши мумкин.

Фарғона кимё заводи ва Raw Materials Cellulose «Важние истории», Vlast.Kz нашрлари ва OCCRP концернининг қўшма текширувида, шунингдек, BBC рус хизматининг текширувида иштирок этган. Материалларда айтилишича, бу икки корхона Россия порох заводларига пахта целлюлозасини ҳам тўғридан-тўғри, ҳам хусусий воситачилар орқали етказиб беради. Журналистларнинг ҳисоб-китобларига кўра, 2022 йилда Россиянинг Украинага кенг кўламли босқини бошланганидан бери ушбу етказиб бериш ҳажми бир неча баробар ошган

Gazeta бу материал эълон қилинган вақтгача заводдан изоҳ ололмади.

Завод ҳақида

Май ойида Украина ҳукумати Ўзбекистоннинг учта компаниясига қарши санкциялар киритганди: Mercury Renaissance, Farg‘ona Kimyo Zavodi (Фарғона пахта целлюлозаси ишлаб чиқариш кимё заводи) ва Raw Materials Cellulose. Корхоналарнинг иккитаси Ўзбекистон фуқароси Рустам Мўминов билан боғлиқ бўлиб, у шахсий санкциялар остида қолган.

Ўша пайтда Mercury Renaissance ва унинг «шуъба корхонаси» Farg‘ona Kimyo Zavodi Рустам Раҳимжонович Мўминов (60%) ва Шаҳриёр Сахиёрович Тожиевга (40%) тегишли эди.

Бугунги кунда улушнинг 60 фоизи Aloqainvest, Breegs, Atrium Tashkent, Geo Profi Mombasa Finance, Aloqa Klimkontrol, Visata Group, Fortress Invest, Pod Klyuch, Professional Legion, Excellent Trans Service, Madad Kapital Invest Mikrokredit Tashkiloti, Construction Machinery, Brown Iron каби компанияларда улушга эга бўлган Ольга Юревна Шагиевага ўтган. Бу бизнесларнинг айримлари илгари ҳам Мўминовга тегишли бўлган.

Корхона маълумотларига кўра, завод йилига 30 минг тоннагача пахта целлюлозаси ишлаб чиқариш қувватига эга бўлиб, маҳсулотнинг қарийб 90 фоизи МДҲ давлатлари, Туркия, Болгария, Хитой ва Европа мамлакатларига экспорт қилинади.