3 йиллик танаффусдан кейин Ўзбекистоннинг биринчи ракеткаси номи ўзгарди

Профессионал теннисчилар ассоциацияси (ATP) ҳафталик янги рейтингни эълон қилди. Янгиланган рўйхатга кирган 8 нафар ўзбекистонлик теннисчидан фақат икки нафари ўз ўрнини яхшилай олди. Энг эътиборга молик томони шундаки, Сергей Фомин уч йиллик танаффусдан сўнг яна мамлакатнинг биринчи ракеткаси мақомини қайтариб олди.

Баҳрайндаги М25 тоифасидаги турнирда ғолиб бўлган Фомин рейтингда бирданига 47 поғона юқорилади ва умумий ҳисобда 23 очко қўшиб олди. Натижада у ATP рейтингида 358-ўринга кўтарилиб, Ҳумоюн Султоновни ортда қолдирди.

16 очко йўқотган Ҳумоюн Султонов эса 46 поғона пасайиб, 442-ўрингача тушиб кетди ва энди Ўзбекистоннинг иккинчи ракеткаси саналади.

Ўзбекистоннинг учинчи рақамли ракеткаси Максим Шин 11 поғона юқорилаб, 966-ўриндан жой олди. Қолган теннисчилар эса янгиланган рейтингда пастлаган: Амир Милушев — 7 поғона, Батир Сапаэв, Илья Игнатов, Абдулазиз Усмонжонов ва Дамир Абдусаломов эса бир хил — 10 поғонадан пастга тушган.

Жаҳоннинг биринчи рақамли ракеткаси испаниялик Карлос Алькасер бўлиб турибди. Иккинчи поғонадан италиялик Янник Синнер жой олган бўлса, кучли учликни Александр Зверов якунлаган. Қозоғистонлик теннисчи Александр Бублик эса Жаҳон рейтингида 11-пўғонани эгаллаб турибди.

Манба: daryo.uz