«Қани натижа?» Президент ИИВнинг кибержиноятчиликка қарши курашиш бўйича фаолиятини танқид қилди

Шавкат Мирзиёев 27 январь кунги мажлисда уч йил олдин Ички ишлар вазирлигида ташкил қилинган Кибержиноятчиликка қарши курашиш бошқармаси фаолиятини танқид қилиб, ташкилот иши ҳали кўринмаётганини қайд этди.

Расмий маълумотларга кўра, ўтган йили Тошкентда кибержиноятлар сони 16 мингдан ортган. Фуқаролар қарийб 2 триллион сўм моддий зарар кўрган бўлса-да, уларни фош этиш 8 фоизга ҳам етмаган.

Давлат раҳбари жиноятчилар банк тизимидаги бўшлиқдан, аҳолининг ишонувчанлигидан ва технологик билим етишмаслигидан фойдаланмоқда.

«Ички ишлар ва прокуратурага бу йўналишда барча масалаларни ҳал қилиб берганман. Қани натижа? Банк ва тўлов ташкилотларида ҳимоя тизимларини жорий этиш қачон якунланади?» — дея давлат раҳбари мутасаддилар олдига қатъий савол қўйди.

Аввалроқ ИИВ Ўзбекистонда 2024 йилда умумий жиноятларнинг 44,4 фоизи кибержиноятлар ҳиссасига тўғри келганини маълум қилганди. Кибержиноятларнинг 98 фоизи банк карталари билан боғлиқ бўлиб, фуқаролар 4 йилда 1,9 трлн сўм зарар кўрган. Шунингдек, машҳурлар қиёфасидан фойдаланган ҳолда жиноят содир этиш (дипфейк) ҳам оммалашмоқда.