Фюри ва Жошуа жанги Кардиффда ўтказилиши мумкин

Профессионал бокснинг супер огир вазн тоифаси собиқ Жаҳон чемпиони Тайсон Фюри яна бир собиқ чемпион Энтони Жошуа билан узоқ кутилган жанги декабрь ойида Уелснинг Кардифф шаҳридаги Principality Stadium”да ўтказилиши мумкин. Томонлар жангни ташкил этиш бўйича музокараларни якунлаш арафасида турибди.

“Британия жанги” номини олган ушбу қарама-қаршиликни ташкил этиш бўйича музокаралар сўнгги ойларда бир неча бор тўхтаб, яна давом этган. Асосий масалалардан бири жангнинг Буюк Британия ёки АҚШда ўтказилиши бўйича келишмовчилик бўлган.

Жошуа ва унинг промоутери Эдди Хирн жангни Буюк Британияда ўтказишни истаган. Турки ал аш-Шайх ҳамда Нетфлих эса жанг учун Нью Йоркдаги “Madison Square Garden” аренасини маъқул кўрган.

Ҳозирда Кардифф асосий вариант сифатида кўрилмоқда. Телеграпҳ Спорт хабарига кўра, жангни 4 ёки 11-декабрь кунлари Кардиффда ўтказиш масаласи сўнгги бир ҳафта давомида муҳокама қилинган. Томонлар шартномани якунлашга яқин турибди.

Жанг шанбага ўтар кечаси, яъни маҳаллий вақт билан ярим тундан кейин бошланиши кутилмоқда. Бунинг учун Уелс ҳукумати стадионнинг одатдаги соат 22:30 даги фаолиятни якунлаш вақтини узайтиришга рухсат бериши керак.

Бундай ҳолат аввал ҳам кузатилган. 2007-йилда Жо Калзаге ва Миккел Кесслер ўртасидаги жанг соат 02:00 да бошланган.

“Principality Stadium”нинг ёпиладиган томи ҳам жангни декабрь ойида ўтказиш учун муҳим омиллардан бири ҳисобланади. Шу билан бирга, Лондондаги “Уембли” стадиони ҳам эҳтимолий арена сифатида муҳокама қилинган.

Жангнинг жума куни кечаси ўтказилиши Нетфлих учун ҳам қулай. Стриминг платформаси АҚШдаги 80 миллион томошабинга мўлжалланган асосий эфир вақтини ҳисобга олмоқда. Шу сабабли Нетфлих жангни АҚШ спорт дастурлари билан тўқнаш келмаслиги учун жума оқшомида намойиш этишни истамоқда.

Аввалига Жошуа ва Фюри ўртасидаги жангни АҚШда 20-ноябрь куни ўтказиш режалаштирилган ва бу бўйича келишув якунланишига оз қолган. Бироқ музокаралар Буюк Британияга кўчирилгач, Кардифф асосий вариантга айланган. Жангни декабрга қолдиришга ноябрь ойида “Принcипалитй Стадиум”да халқаро регби учрашувлари ўтказилиши сабаб бўлган.

Музокараларда ҳар икки боксчининг жамоаси, жумладан Эдди Хирн, Фюрининг менежери Спенсер Браун, Турки ал аш-Шайх ва унинг жамоаси, шунингдек, Нетфлих вакиллари иштирок этмоқда. Жангни тарғиб қилишга бағишланган матбуот анжумани яқин кунларда ўтказилиши кутилмоқда.

38 ёшли Фюри профессионал боксда 39 та жанг ўтказиб, уларнинг 36 тасида ғалаба қозонган. “Лўлилар қироли” фақат икки марта мағлубиятга учраган ва битта жанги дуранг билан якунланган. У мутлақ Жаҳон чемпионлиги учун кечган иккита баҳсда украиналик Олександр Усикка имкониятни бой берган.

Фюри 2024-йил декабрида Усикка мағлуб бўлганидан сўнг фаолиятини якунлаганини эълон қилганди. Бироқ Тайсон 2026-йил январида рингга қайтишини маълум қилди ва иккита ғалабага эришди (Арсланбек Маҳмудов ва Мариус Вах).

36 ёшли Жошуа ўтган йил декабрь ойида Нигерияда содир бўлган автоҳалокатдан кейин жанг ўтказмади. Мазкур автоҳалокатда унинг икки яқин дўсти ҳалок бўлган. Жошуа июль ойида рингга қайтиб, жанг ўтказган. У профессионал боксда 34 та жангда иштирок этиб, уларнинг 30 тасида ғалаба қозонган. “АЖ” фақат 4 марта мағлубиятга учраган.

Аввалроқ супер оғир вазн тоифасида собиқ Жаҳон чемпионлари, британиялик Тайсон Фюри (36-2-1) ва Энтони Жошуа (30-4) 2026-йилнинг тўртинчи чорагида ўзаро тўқнаш келиши ҳақида хабар берилган эди. Шунингдек, Фюри Жошуа билан жанг ташкил этилмаса, фаолиятини якунлашини билдирган.