Ўзбекистонда томошалар кўпаяди: кино, театр ва болалар контенти 10 йилга бешта солиқдан озод қилинди
Ўзбекистонда маданият ва санъат соҳасидаги бир қатор ташкилотлар учун қарийб ўн йил муддатга кенг кўламли солиқ имтиёзлари жорий этилди. Бешта солиқни тўлашдан, жумладан, кинематография корхоналари, нодавлат театрлар ва болалар учун контент яратувчилар озод этилмоқда. Имтиёзлар ушбу ташкилотлар ходимларига ҳам татбиқ этилади.
Солиқ қўмитаси ахборот хизматининг хабарига кўра, имтиёзли давр 2026 йил 1 сентябрдан 2036 йил 1 январгача амал қилади. Чора-тадбирлар Президентнинг 2026 йил 2 июндаги «Маданият, санъат ва адабиёт соҳаларини янада ривожлантириш бўйича кенг кўламли чора-тадбирлар тўғрисида»ги фармонида назарда тутилган.
Солиқ имтиёзлари асосий фаолият тури концерт-томоша фаолияти ва кинематография бўлган ташкилотларга, шунингдек, болалар учун контент яратувчиларга татбиқ этилади. Имтиёз олувчилар рўйхатига нодавлат театрлар ва театр-студиялар, шунингдек, маданият ва санъат соҳасида фаолият юритаётган хусусий таълим ташкилотлари киритилган.
Ушбу ташкилотлар қўшилган қиймат солиғи (ҚҚС), фойда солиғи, айланмадан олинадиган солиқ, ер солиғи ва мол-мулк солиғини тўлашдан озод этилади. Ўз навбатида, уларнинг ходимлари жисмоний шахслардан олинадиган даромад солиғидан (ЖШДС) озод қилинади.
Ўзбекистон ҳудудида кино маҳсулотларини яратишда иштирок этаётган хорижий компаниялар учун алоҳида чора назарда тутилган. Бундай фаолиятдан олинган даромадлар тўлов манбаида норезидентларнинг даромадларига солиқ солишда солиқ базасига киритилмайди.
Шу тариқа, давлат миллий киноишлаб чиқариш, нодавлат театрлар, болалар контенти ва санъат соҳасидаги хусусий таълимни ривожлантириш учун янада қулай шароитлар яратишни мўлжалламоқда.
В. Новиков