Ўзбекистон ва «Air Arabia» янги авиарейсларни йўлга қўйиш ҳамда сайёҳлар оқимини оширишни муҳокама қилди

Ўзбекистон Республикаси Туризм қўмитасида «Air Arabia» авиакомпанияси вакиллари билан учрашув бўлиб ўтди. Музокараларда Самарқанд, Бухоро ва Хива каби тарихий шаҳарларга янги тўғридан-тўғри авиарейсларни очиш ҳамда амалдаги Тошкент – Шаржа ва Тошкент – Абу-Даби йўналишлари бўйича парвозлар частотасини ошириш масалалари муҳокама қилинди. Ҳозирда авиакомпания Тошкент ва Наманган шаҳарларига ҳафтасига 13 та рейс амалга ошириб келмоқда.

Шунингдек, томонлар «Air Arabia»нинг халқаро йўналишлар тармоғидан фойдаланган ҳолда Европа, Яқин Шарқ, Осиё ва Шимолий Африкадан транзит сайёҳларни жалб қилиш, «Умра плюс» дастурини ривожлантириш ҳамда биргаликда маркетинг кампанияларини ўтказишга келишиб олдилар. Авиакомпания Ўзбекистоннинг туристик салоҳиятини тарғиб қилиш мақсадида блогер ва туроператорлар учун инфотурлар ташкил этишга, шунингдек, самолёт бортларида мамлакат ҳақида ахборот материалларини жойлаштиришга тайёрлигини билдирди. Бундан ташқари, «Air Arabia» вакиллари ноябрь ойида бўлиб ўтадиган 31-Тошкент халқаро туристик ярмаркасига таклиф этилди.