Литва Усмонов ва Фридманнинг активларини музлатди
Литва ҳукумати Ташқи ишлар вазирлиги томонидан таклиф этилган ва россиялик тадбиркорлар Алишер Усмонов ҳамда Михаил Фридманнинг миллий активларини музлатишни назарда тутувчи қарорни маъқуллади. Ушбу чекловлар Европа Иттифоқи икки тадбиркорга нисбатан санкцияларни бекор қилганидан сўнг жорий этилди ва 2027 йилнинг охиригача амалда бўлади. Иккала тадбиркор ҳам сентябрь ойи охирида Литванинг «номақбул шахслар» рўйхатига киритилган эди.
Вильнюс Усмонов ва Фридманнинг ЕИ санкциялар рўйхатидан чиқарилишига қарши чиқди ва овоз беришда бетараф қолди. Европа Иттифоқи санкциялари бекор қилингач, уларнинг маблағлари ва иқтисодий ресурсларини бутун блок миқёсида музлатиш тартиби Литвада ўз кучини йўқотган эди.
«Литва сиёсий сабабларга кўра ЕИ санкциялар рўйхатидан ҳар қандай шахсларни чиқаришга изчил равишда қарши чиқади», — дейилади Ташқи ишлар вазирлиги баёнотида. Шунингдек, вазирлик Латвия ва Эстония ҳам шунга ўхшаш чораларни қабул қилганини қўшимча қилди.
Усмонов ва Фридманга нисбатан ЕИ санкциялари бир нечта аъзо давлатларнинг илтимосига кўра бекор қилинди.
Франция расмийлари Усмоновни санкциялар рўйхатидан чиқаришни сўрашда миллий хавфсизлик важларини келтирган, бироқ ошкора равишда қўшимча тафсилотларни очиқламаган. Financial Times нашрининг хабар беришича, бу қадам Озарбайжонда ҳибсга олинган Франция фуқароларини озод қилиш бўйича эҳтимолий келишув билан боғлиқ бўлиши мумкин.
Люксембург эса активлари музлатилгани сабабли мамлакатга қарши 15 миллиард евролик даъво аризаси киритган Фридманнинг рўйхатдан чиқарилишини сўраган.
Сентябрь ойи охирида ЕИга аъзо мамлакатлар Россиянинг тажовузига алоқадор 3 мингга яқин жисмоний ва юридик шахсларга нисбатан санкцияларни уч йил муддатга узайтиришга келишиб олган эдилар.