Ўзбекистон-Латвия ҳамкорлиги янги марраларни кўзламоқда
Ўзбекистон Савдо-саноат палатаси биносида Ўзбекистон-Латвия ишбилармонлар кенгашининг иккинчи йиғилиши бўлиб ўтди. Тадбирни Ўзбекистон Савдо-саноат палатаси раисининг ўринбосари Ф.Усмонов олиб борди.
Тадбирда Инвестициялар ва ташқи савдо вазирининг биринчи ўринбосари Л.Қудратов, Ўзбекистон Савдо-саноат палатаси раиси А.Икромов, Латвия Иш берувчилар конфедерацияси (LDDK) президенти Виталийс Гавриловс ва бошқа вазирлик, идоралар вакиллари ҳамда икки мамлакат ишбилармон доиралари вакиллари иштирок этди.
Тадбирнинг асосий мавзуси Ўзбекистон ва Латвиянинг сармоявий ва савдо-иқтисодий ҳамкорлигини янада ривожлантиришнинг ҳал қилувчи омили сифатида икки мамлакат ишбилармон доиралари ўртасидаги икки томонлама алоқаларни мустаҳкамлаш масалалари бўлди.
Ўзбекистон Савдо-саноат палатаси раиси А.Икрамов сўзга чиқиб, мамлакатларимиз ўртасидаги фаол ҳамкорлик туфайли Латвия ва Ўзбекистон ишбилармон доиралари савдо-иқтисодий ва сармоявий соҳаларда қўшма ҳамкорликни жадал амалга ошираётганини таъкидлади.
Ўзбекистон-Латвия ишбилармонлар кенгаши, ўз навбатида, икки мамлакат ишбилармон доираларининг яқин, тўғридан-тўғри ҳамкорлиги, савдо-иқтисодий, сармоявий алоқаларни янада чуқурлаштириш ва кенгайтиришга қаратилган кўплаб қўшма тадбирларни ўтказиш, Ўзбекистон ва Латвия ўртасидаги технологик, транспорт-логистика ва бошқа соҳалардаги ҳамкорлик қилишда муҳим платформа бўлиб хизмат қилмоқда.
Латвия Иш берувчилар конфедерацияси (LDDK) президенти Виталийс Гавриловс Ўзбекистон ва Латвия учун устувор йўналишлар бўйича иқтисодий шерикликни изчил кенгайтириш ва икки давлат ишбилармон доиралари вакиллари ўртасидаги ҳамкорлик фаоллаштиришга эътибор қаратилаётганини алоҳида таъкидлади. Учрашув давомида меҳмонлар Ўзбекистоннинг сармоявий салоҳияти, шунингдек, мамлакатимизда бизнес юритиш учун яратилган барча шароитлар ҳақидаги тақдимот материаллари билан таништирилди.
Унда Ўзбекистон томонидан “Ўзчармсаноат” уюшмаси раиси ўринбосари Фарҳод Нурмуҳамедов иштирок этди.
Латвия томонидан Латвия Транспорт вазирлиги Давлат котиби ўринбосари Улдис Рейманис, Латвия Қишлоқ хўжалиги вазирлиги парламент котиби Эдгарс Кронбергс иштирок этди.
Тадбир сўнгида ҳамкорликка оид икки томонлама ҳужжатларни имзолаш маросими бўлиб ўтди.
Маълумот учун: 2021-йил якунига кўра, ўзаро товар айирбошлаш ҳажми 228 миллион долларни ташкил этди, жумладан, экспорт – 52,8 миллион доллар, импорт 175 миллион доллар
Ҳозирда Мамлакатимизда Латвия инвесторлари иштирокидаги 68 та компания фаолият юритаётган бўлиб, улардан 46 та қўшма корхона бўлса, 22 таси эса 100% Латвия капиталига эга ва корхоналар ҳисобланади. Шунингдек, Латвиянинг 1 та ваколатхонаси ҳам Ўзбекистонда фаолият юритмоқда.