«Norway Chess». Нодирбек Абдусатторовнинг омади келмаяпти

Норвегияда 10 нафар гроссмейстер иштирокидаги нуфузли «Norway Chess» турнирида кеча 6-тур баҳслари ўтказилди.

Унда Нодирбек Абдусатторов мусобақа пешқадами бўлиб турган Фабиано Каруанага қарши оқ доналарда ўйнади. Ушбу турнирда ҳамюртимиз негадир хатоларга йўл қўймоқда. Боз устига, рақиб хатосидан ҳам фойдалана олмаяпти. Нодирбек 49-56-юришлар оралиғида йўл қўйган хатолар АҚШлик шахматчига ғалабани тақдим этди.

Натижада Каруана ўз очколарини 13,5 тага етказиб ўз пешқадамлигини мустаҳкамлаган бўлса, Абдусатторов 6 очко билан 9-ўринга янада «маҳкамроқ» ўрнашди.

Бугун Нодирбек Абдусатторов яна бир АҚШлик спортчи Со Уэслига қарши қора доналарда ўйнайди.

Манба: stadion.uz