Достон Рўзиев – Тошкент «Катта дубулға» турнири чемпиони!

Дзюдо бўйича Ўзбекистон терма жамоаси аъзоси Достон Рўзиев Тошкент «Катта дубулға» турнирида ҳамюртларимизнинг илк медалига муаллифлик қилди. Спортчимиз — 60 кг вазн тоифасида кечган финал баҳсида жаҳон чемпионати совриндори, грузиялик Гиорги Сардалашвилини мағлубиятга учратиб, олтин медалга сазовор бўлди.

Достон Рўзиев учун мазкур медаль фаолиятидаги муҳим ғалаба бўлди. Боиси, ҳамюртимиз илк бор IJF таснифидаги мусобақаларнинг финалида иштирок этибгина қолмай, олтин медални ҳам қўлга киритди.

Дзюдочимиз партердаги ажойиб ҳаракатлари билан рақибларидан бир бош устун эканини кўрсатди. Бу олтин медаль Рўзиевга жаҳон ва Париж — 2024 рейтинги учун 1000 очко тақдим қилди. Дзюдочимиз олтин медални Спорт вазири Адҳам Икрамовдан қабул қилиб олди.

Манба: olympic.uz