Спорт курашлари бўйича Жаҳон чемпионатида уч нафар ҳамюртимиздан иккиси мағлуб бўлиб улгурди

Бугун Албания пойтахти Тирана шаҳрида спорт курашлари бўйича но олимпия вазн тоифаларида жаҳон чемпионати старт олди.

Уч кун давом этадиган мусобақада Ўзбекистон терма жамоасининг уч нафар аъзоси иштирок этиши ҳақида хабар бергандик.

Турнирнинг илк куни доирасида юнон-рим кураши усталари — Абдулло Алиев (72 кг) ҳамда Жалгасбай Бердимуратов (82 кг) гиламга чиқди.

Алиев саралаш босқичида қирғизистонлик Ирискелди Хамзаевни 2:1, нимчорак финалда молдовалик Михай Петични 7:2 ҳисобида мағлубиятга учратди.

Чорак финалда эса Абдулло Франция вакили Ибраҳим Маҳмуд Ганемга 0:6 ҳисобида имкониятни бой берди.

Жалгасбай Бердимуратов эса саралашда арманистонлик Карен Хачатрянни 6:0, нимчорак финалда қозоғистонлик Евгений Поливадовни 9:0 ҳисобида доғда қолдирди. Венгрия вакили Эрик Сзилвассига қарши чорак финал баҳсида эса ҳамюртимизга омад етишмади — 1:6.

Эндиликда уларнинг рақиблари финалга йўл олган тақдирдагина вакилларимиз ўтиш босқичида иштирок этиш ҳуқуқини қўлга киритади.

Маълумот ўрнида, мусобақанинг эркин кураш баҳсларида 79 кг вазнли Мирзо Ҳайитов Ўзбекистон шарафини ҳимоя қилади.