Андижонда 8 синф ўқувчи қизлар йигит талашиб жанжаллашди

Ҳолат юзасидан расмий муносабат билдирилди.

Аввалроқ, ижтимоий тармоқларда ўсмир қизларнинг жанжали акс этган видео тарқалиб, муҳокамаларга сабаб бўлган эди.

Ҳолат юзасидан Хўжаобод тумани ҳокимлиги Матбуот хизмати расмий муносабат билдирди.

Маълум бўлишича, ушбу ҳолат жорий йилнинг 2 ноябрь куни соат тахминан 13:00 атрофида содир бўлган.

Унда 2008 йилда туғилган қиз Д.Р. 8 синф ўқувчиси бўлган синглиси Р.Х. дугоналари билан уришганлигини эшитиб, Хўжаобод тумани Обод кўчасига борган. Шунда тарафма-тараф бўлиб уришаётганлигини кўриб синглисини дугонаси М. билан Р. исмли қизларнинг уришаётган ҳолатни ўзининг телефонига видеотасвирга олиб, Instagram’даги саҳифасига жойлаштирган.

Аниқланишича, М.М. исмли қиз ўзининг Instagram’даги саҳифаси орқали танишган йигити билан Р.И. исмли қизнинг ижтимоий тармоқ орқали гаплашиб қўйганлиги сабабли, телефонда жанжаллашиб кетган. Натижада улар кўришиб, гаплашиб олмоқчи бўлган. Бироқ улар бирга синфдошларини етаклаб келган. Шу вақтда улар ўртасидаги жанжал урушга айланиб кетган.

Ҳозирда туман ИИБ ходимлари томонидан терговга қадар текширув ҳаракатлари олиб борилмоқда.