Пойтахтда ноқонуний реклама баннерлари демонтаж қилинмоқда

Тошкент шаҳар ҳокимлиги реклама иншоотлари эгаларини ўз рекламаларини ягона дизайн-код талабларига мувофиқлаштирган ҳолда қонунийлаштиришга чақирди.

Маълум қилинишича, ахборот шовқини ва реклама иншоотларининг тартибсиз жойлашуви шаҳарнинг меъморий қиёфасини идрок этишга салбий таъсир кўрсатадиган визуал тартибсизликни келтириб чиқаради.

Бу масалани ҳал қилиш учун Тошкент шаҳар ҳокимлиги қуйидагиларни маълум қилди.

«Биз барча реклама иншоотлари эгаларини вақтни бой бермасдан ўз рекламаларини ягона дизайн-код талабларига мувофиқлаштирган ҳолда қонунийлаштириш чораларини кўришга чақирамиз. Ушбу дизайн-код шаҳарнинг барча аҳолиси ва меҳмонлари учун янада қулай ва визуал жиҳатдан ёқимли бўлиши мақсадида ҳокимликнинг Рақамли ривожланиш департаменти томонидан ишлаб чиқилган ва тасдиқланган»,- дейилади хабарда.

Таъкидланишича, тасдиқланган дизайн-кодига мос келадиган қонуний реклама нафақат Тошкентнинг визуал қиёфасини яхшилайди, балки бизнес учун қулай шароитлар яратиб, потенциал мижозларнинг кўпроқ эътибори ва ишончини қозонишга ёрдам беради.