Фарғонада қарийб 500 млн сўмлик заргарлик буюмларини олиб кирмоқчи бўлган шахс ушланди

Истанбулдан келган фуқаро 600 граммдан ортиқ заргарлик буюмларини божхона тўловисиз олиб киришга уринган.

Божхона қўмитаси хабарига кўра, Фарғона вилояти божхона бошқармаси “Фарғона аэропорти” чегара божхона пости ходимлари томонидан “Истанбул-Фарғона” йўналишида Фарғона шаҳрига учиб келган фуқаро олиб кириш меъёридан ортиқча ва божхона назоратидан ўтказилиши зарур бўлган товарлари мавжуд эмаслигини маълум қилган ҳолда йўловчи божхона декларацияни тўлдирмасдан “яшил йўлак” орқали ҳаракатланган.

Ушбу фуқаро ҳаракатлари божхона ходимларида шубҳа уйғотганлиги сабабли тўхтатилиб ўзи ва унга тегишли бўлган қўл сумкалари белгиланган тартибда божхона назоратдан ўтказилди.

Натижада, фуқаро қўл сумкасида, ўзида тақилган ва тана аъзоларига яширилган умумий қиймати 483 млн сўмлик оғирлиги 620 гр.га тенг бўлган 5 турдаги 105 дона заргарлик буюмларини божхона назоратидан яшириб олиб ўтаётганлиги аниқланди.

Ҳозирда ҳолат юзасидан терговга қадар текширув ҳаракатлари олиб борилмоқда.

Эслатиб ўтамиз: амалдаги тартибларга кўра жисмоний шахслар томонидан божхона тўловлари ундирилмасдан республикага олиб киришга қимматбаҳо металлар ва қимматбаҳо тошлардан ясалган заргарлик буюмлар учун меъёр 65 гр. этиб белгиланган.