Барча давлат идоралари битта бинога кўчирилади, бўшаган 150 та объект эса бизнесга сотилади

Шавкат Мирзиёев 15 та шаҳарда барча давлат идоралари битта бинога кўчирилишини, бўшаган объектлар тадбиркорларга сотувга қўйилишини маълум қилди.

Президентнинг кичик ва ўрта бизнес вакиллари билан учрашувида 15 та шаҳар ва тумандаги барча давлат идоралари ҳар бир туман марказида биттадан кўп қаватли бино қуриб битказилиши маълум қилинди.

Бунда ушбу биноларнинг биринчи ва иккинчи қавати тадбиркорларга сотилади.

Бундан ташқари, давлат хизматчиларидан бўшатилган 150 та бино аукционга қўйилади.

«Ҳокимлар биринчи навбатда ҳудудини кенгайтирмоқчи бўлган тадбиркорлар сўраган жойларни аукционга чиқариши керак,» - деди президент.

Давлат раҳбари Тошкент шаҳрининг Юнусобод туманидаги «Мингбоев Роботикс» корхонасида ногиронлиги бўлган шахслар учун протез ва экзоскелетлар ишлаб чиқарилаётгани ҳақида маълумот берди. Тадбиркор фаолиятини кенгайтириш мақсадида ногиронлиги бўлган шахслар ташриф буюриши учун қулай жой сўради.

Президент юқори технологик маҳсулотлар яратаётган бундай тадбиркорларга 10 минг квадрат метргача бўлган давлат объектлари 5 йил муддатга бепул ажратилишини маълум қилди.