Хонанда Ботир Қодиров жавобгарликка тортилди

Шеърлари кўплаб санъаткорларни машҳур қилган шоир хонанда Ботир Қодиров устидан Адлияга шикоят қилди.

Адлия вазирлиги томонидан халқ орасида «Шамсиддин Садоий» тахаллуси билан танилган шоир Шамсиддин Тўраевнинг мурожаати асосида "Давлатинг борида”, “Омонат” ва “Тингла дўстим” номли шеърлари хонанда Ботир Қодиров томонидан ҳуқуқ эгаси рухсатисиз ҳамда тегишли тартибда муаллифлик ҳақини тўламасдан фойдаланилганлиги аниқланди. Бу ҳақда вазирлик Матбуот хизмати хабар қилди.

Ҳолат юзасидан ҳуқуқбузарга нисбатан МЖтКнинг 177 прим 1-моддаси билан маъмурий ҳуқуқбузарлик тўғрисидаги баённома расмийлаштирилиб, тегишли судга юборилди.

Тошкент шаҳар жиноят ишлари бўйича Чилонзор туман судининг қарорига кўра, ҳуқуқбузарга нисбатан МЖтКнинг 177 прим 1-моддасининг биринчи қисми билан БҲМнинг 5 (беш) баравари миқдорида – 1 млн 875минг сўм жарима жазоси тайинланди.