Дунёнинг 140 га яқин мамлакатларининг 105 парламенти етакчилари ва 2000 дан зиёд паламент вакиллари ҳамда 50 та халқаро ташкилотдан 110 нафар делегация аъзолари ушбу халқаро анжуман доирасидаги тадбирларда иштирок этиши кутилмоқда.

“Ижтимоий тараққиёт ва адолат учун парламент ҳаракати” мавзусида ўтказиладиган Ассамблеянинг туркум йиғилишларида бутун дунё парламент делегациялари томонидан кўплаб долзарб масалар муҳокама қилинади. Форум якунида иштирокчи мамлакатларнинг халқаро ҳамкорликнинг асосий масалалари бўйича якдил позициясини акс эттирувчи дастурий ҳужжат – Тошкент декларацияси қабул қилиниши назарда тутилмоқда.

Парламентлараро иттифоқ (ингл. Inter-Parliamentary Union, IPU) – халқаро парламент ташкилоти бўлиб, парламентлараро мулоқотнинг энг йирик платформаси ҳисобланади. 1889-йилда ташкил этилган, ҳозирда 181 мамлакат парламентларини бирлаштиради.

Парламентлараро Иттифоқнинг Ўзбекистондаги 150-Ассамблеяси нафақат аъзо мамлакатлар, балки бутун халқаро парламент дипломатияси тизими учун алоҳида аҳамиятга эга. Замонавий таҳдидлар шароитида, давлатлар ўртасидаги ҳамкорлик зарурати долзарб бўлиб бораётган бир пайтда, бундай платформалар мулоқотни йўлга қўйиш, ишончни мустаҳкамлаш ва глобал муаммоларни ҳал қилиш йўлларини биргаликда излаш имконини беради.

Ушбу тадбирнинг Ўзбекистонда ўтказилиши унинг глобал сиёсатдаги фаол ролини ва халқаро алоқаларни мустаҳкамлашга интилишини яна бир бор тасдиқлайди. Мамлакатимизнинг конструктив мулоқотни илгари суриш ва дипломатик ташаббусларни ривожлантириш борасидаги саъй-ҳаракатлари эътироф этилганидан далолат беради.