Бельгия телекоммуникация соҳасидаги коррупция иши бўйича мусодара қилинган 108 млн долларни Ўзбекистонга ўтказади
Маблағлар Бельгияда телекоммуникация шартномаларини бериш билан боғлиқ воситачилик ҳақини ноқонуний олиш ва даромадларни легаллаштириш ҳолатларини тергов қилган Ўзбекистон адлия органларининг сўровига кўра мусодара қилинган.
«Брюссель прокуратураси Ўзбекистон адлия органларидан халқаро ҳуқуқий ёрдам кўрсатиш бўйича сўров олди. БМТнинг Коррупцияга қарши конвенциясига асосланган ушбу халқаро топшириқ ижроси натижасида Ўзбекистон расмийларининг илтимосига биноан Бельгияда 200 млн доллар миқдоридаги маблағлар хатланган», — дейилади хабарда.
Нидерланд тилида сўзлашувчи Брюссель судининг қарорига кўра, ушбу активлар ва уларга ҳисобланган фоизлар икки давлат ўртасида тақсимланиши керак.
Суд 108 млн доллар Ўзбекистонга ўтказилиши ҳақида қарор чиқарди. Маблағларни тақсимлаш мусодара қилинган суммаларни Европа Иттифоқига аъзо давлатлар ўртасида тақсимлаш механизмига ўхшаш тарзда амалга оширилди.
Аввалроқ Брюссель прокуратураси мол-мулкни хатлаш ва мусодара қилиш бўйича марказий органга (COIV) мурожаат қилиб, қолган маблағларни Бельгия давлат ғазнасига ўтказишни сўраган эди.
Гап Ўзбекистон биринчи президентининг қизи Гулнора Каримовага нисбатан қўзғатилган жиноий иш ҳақида кетаётган бўлиши мумкин. 2022 йил сентябрь ойида адлия вазири ўринбосари Музраф Икромов Гулнора Каримова ва у бошчилигидаги жиноий гуруҳнинг Франция, АҚШ, Латвия ва бошқа мамлакатлардаги умумий активлари қарийб 1,4 млрд долларга ёки 15 трлн сўмга баҳоланганини маълум қилганди.
Ўшанда у Адлия вазирлиги Бельгия ҳуқуқ-тартибот идоралари билан ушбу мамлакатдан қарийб 240 миллион долларлик активларни қайтариш бўйича ишларни бошлашни режалаштираётганини таъкидлаганди.
«Бельгияда тергов жараёни ҳали якунланмагани сабабли (тергов сири), бу активлар ҳақида кўп маълумотларни ошкор қилишнинг иложи йўқ», — деганди вазир ўринбосари.
«Газета.uz» сўровига жавобан Адлия вазирлиги матбуот хизмати ҳозирча маълумотга эга эмаслигини маълум қилди.
Аввалроқ Ўзбекистон ва Швейцария Ўзбекистон аҳолиси манфаатлари йўлида мусодара қилинган, ноқонуний орттирилган 313 млн долларлик активларни қайтариш бўйича келишувларни имзолаганди.
Гулнора Каримова 2015 йилда 5 йилга озодликни чеклаш жазосига ҳукм қилинган, 2019 йилда эса колонияга ўтказилган. 2020 йил март ойида у «давлат маблағларини ўзлаштириш ва Ўзбекистон манфаатларига зид равишда битимлар тузиш, шунингдек, жуда кўп миқдорда товламачилик йўли билан ўзганинг мулкини қўлга киритиш»да айбланиб, яна 13 йилу 4 ойга қамалган.
2012 йилда Нидерландия, Швейцария ва Швецияда, 2014 йилда эса АҚШда Ўзбекистон телекоммуникация бозорида порахўрлик бўйича тергов бошланган. Америка томони версиясига кўра, Россиянинг MTS ва VimpelSom компаниялари ҳамда Швеция-Финляндиянинг TeliaSonera компанияси сохта фирмалар орқали Каримовага яқин шахсларга бозорга кириш учун пора берган.
2019 йилда МТС Ўзбекистондаги коррупция иши бўйича АҚШ ҳукумати билан келишув битими тузган ва 850 миллион доллар жарима тўлайдиган бўлди. VEON компанияси 2016 йил февралида тинчлик келишуви шартларига кўра АҚШга 795 млн доллар жарима тўлаган. Telia 2017 йил сентябрь ойида АҚШ ва Нидерландия расмийларига 965 миллион доллар ўтказган.